Chanmari vs Zarkawt - a hun a thleng e!
Sharda University Mizoram Super League X-ah zanin dar 8:30 hian semifinal khelh a ni dawn a, Chanmari BC leh Zarkawt BCA an intawng dawn - anni pahnih intawng tur hi a hmuhnawm ang, tia sawi ngam a ni.
Club pahnih hian league round-a match sarih an khelhah khan point 12 ve ve an hlawh chhuak a, an intiat tawk hle. MSL semifinal hi best of three series-a khelh ni mah se, match thumna khelh hah kher ngai loa chingfel turin club pahnihin zaninah chaka bul ṭan an tum dawn.
League round lama an intawn ṭumin Chanmari BC-in hnehna an chang a, inchhuang thei erawh an awm lo - an chakna hi point hnih chauh a ni a, 77-75 in an chak! Club pahnih intawn hmasak zawk hi tun season MSL-a an match hmasa ber ve ve a ni a, BCA hneh hi Chanmari inrintawkna petu a ni.
R. Dengṭhuama Indoor Stadium, Mualpuiah an hneh tawh hnu team hi Chanmariin hneh loh an duh dawn lo a, chumi tur chuan inkhel boruak sangah tawnhriat nei ṭha Moses Zoremmawia'n mawhphurhna a lak thiam a ṭul dawn a, Lalnunsanga leh Michael Liansanga te pawhin an theihna sang bera an khelhchhuah a ṭul dawn.
Lam hmaih thiang lo chu Gregoryshon Magee a ni a, India an rawn pan hmaa ram 11 ngawta basketball league lo khel tawh player hian MSL nomawi chawi hlutzia a hriat duh chuan Zarkawt lakah a theihna a pholan hmasak a ṭul dawn.
Chutihrual chuan Zarkawt BCA hi dah hniam an thiang lo. MSL nomawi vawi nga chawi a, champion ngun ber team hian tun season-a an match hmasa pahnihah hnehna chang zo lo mah se, boruak sang ngam an nihna pholangin, a hnu league match ngaah an chak vek a, semifinal an lut zui.
Zaninah pawh tawnhriat nei ṭha tak tak player fehchhuahpui tur an neih nual chu an inchhuanna tur a ni. Lalrina Renthlei hi a thiamna piahlamah, a tawnhriat neih ṭhat chu chhawr ṭangkai tur a ni leh dawn a, R. Lalnunpuia pawh hi Chanmari tan buaipui tham a tling ang.
Matthew Remtluanga Sailo pawh sawi hmaih thiang lo a ni a, Marquis Cunningham mawlh hian boruak a siam ṭhin - zaninah pawh ani hi a che ṭha a nih phawt chuan Chanmari tan a harsa tawh ang tih a chiang.
Tlai dar 5:30 hian Champhai BC leh Electric BC ten relegation playoff an khel hmasa dawn a, hei pawh mit titlai a tling dawn - Champhai hi Aizawl pawn aṭanga MSL khel awmchhun an ni a, tun season-ah MSL round khat chu an thleng bawk.
Champhaiin MSL club an nihna mangṭha mai an phal lo ang tih a chiang a, chumi tur chuan Electric BC hneha bul an ṭan a ṭul dawn thung - league round-a an intawn ṭumin Champhai hian 98-72 in an hneh.
League-a an hneh tawh hnu laka tlawm Champhaiin an duh dawn loh avangin Lalropuia leh Dee Franklin te chet ṭhat a ṭul dawn. Hetihlai hian Electric-in league round thawnthu her danglam an tum ve thung dawn.
Electric hi league round match sarih an khelhah an tlawm vek - relegation playoff paltlang a, MSL an inhamtang a nih ngat chuan Mizoram basketball chanchina thawnthu ngaihnawm pawl a tling ang.
AS Sarath, Lalhlunmawia leh Zonunsanga te an che ṭha a nih chuan Electric-in tun season-a a vawi khat nan MSL-ah eng an chhi dawn tihna a ni - en a châkawm tawh takzet.
R. Dengṭhuama Indoor Stadium, Mualpuia inkhel hi a hmuna en duh tan, triket.in-ah courtside (tlarhma) lam chu Rs. 300 in ticket a lei theih a, Rs. 150 leh Rs. 50 man ticket awm bawkin, a hmunah a lei theih.