Champion rinkai Barca hmaah Dortmund

UEFA Champions League group stage-ah Liverpool a chung berah an awm a, an hnuai chiah Barcelona an awm. Reds an tlak takah chuan Barca chu team ṭha bera ngaih theih an ni a, Hansi Flick-a hote hian zanin dar 12:30 hian Borussia Dortmund an mikhual ang.

Group stage-ah club pahnih hi an inhmachhawn tawh a, December 12, 2024 khan Catalan club-in Signal Iduna Park luhchhuahin Dortmund hi 3-2 in an hneh. Khualmualah Flick-a hote hi chak mah se nuam sain an chak lo a, semifinal lut chianga inngaih ngawt a la rem lo.

Barcelona hi La Liga-ah table chung berah awm mah se kartawp khan Real Betis nen 1-1 in an inhnehtawk a, chutihrualin an player pawimawh Raphinha chu bench-ah an dah tih hriat a ṭha. Catalan club hian goalkeeper Marc-André ter Stegen inhliam vangin mangang viau mah se tunah erawh Germany goalkeeper hi rawn let rih lo mah se pawi an ti tawh lo ang.

Arsenal keeper hlui Wojciech Szczesny a che ṭha ṭhin a, Benfica an hneh theihna kawngah pawh a pawimawh hle. Chutihrualin tlarhnung lam aiin tlarhma lam a langsar zawk. Lamine Yamal hian a kum phu loin tawnhriat a nei ṭha a, Flick awm hnuah goal hmaah Robert Lewandowski a hriam leh ta viau bawk.

Zanin an khelhna tur hi Estadi Olímpic Lluís Companys a ni bawk nen chak turin Barcelona buk a rit hle. Dortmund lamin hliam an ngah ve bawk a, a bik takin Pascal Gross leh Nico Schlotterbeck inhliam an tuar lehzual ang.

Mahse maw, Dortmund hian league match hnuhnung berah SC Freiburg chu khualmualah 4-1 in an sawp. Dortmund hian inrintawkna an nasa tak an neih phah ang. Dortmund boss Niko Kovac chuan, "Barcelona hi tunah tak chuan an attack hi a na ber a ni hial ang. Hei vang tak hian tum an harsa dawn a ni," tiin a sawi a, Bayern Munich manager hlui hian a khingpuite a hrechiang tih a hriat a, a dan dan tur pawh a duang uluk khawp ang.