Silly Point : Khawvel leh ball vir

Kan chenna khawvel hi nitin a vir ngaiin a vir zel a. Nipui, fur, favang, thlasik te a lo inher chhuak ṭhin ang leh a mi chenga te pawh kumhlun tumah kan awm lo ang bawkin, he infiamna khawvelah pawh hian kumhlun tur hi a lo awm meuh lo a ni.

Vuai Hma SRH

Nikum IPL season lama , T20 game rawn thlak danglamtu, final an luh thlenga a tumpuite cyclone-na takin a nuai anga nuai ṭhin Sunrisers Hyderabad (SRH) team lam pawh kumin chu an che hleithei bik lo.

Nikum lama powerplay laia run 100 vuakchhuah hmanga an tumpuite an rikrap piah lamah harh chhuahlehna hun pe tawh lo khawpa khawsak ching kha kuminah erawh anmahni zawk an harh chhuak zo tlat hrih lo. Travis Head leh Abhishek Sharma te form-in nikum lam a phak loh vang a ni ber awm e.

Lal ngai lo lal a na lo

Tun dinhmunah IPL la champion ngai miah lo team pathum Delhi Capitals, Royal Challengers Bengaluru leh Punjab Kings ten top 4 dinhmun an luah mek. Tin vawi khat chiah la champion Gujarat Titans hi pahnihna dinhmun luahtu an ni bawk.

IPL an la champion ngai lohna hian rilṭamna leh tumruhna thar a pe nge ni? A hmawr bawk dawn hnaiah hian Chennai Super Kings, Kolkata Knight Riders leh Mumbai Indians te ho bawk kan hmu leh dawn. Zin kawng thui tak a la awm a, engmah a la chiang lo. Bul ṭan ṭhat chu a chanve zo an ti a nih chuan, tuna league stage hmun lia ṭhena hmun khat kan thlir zawh tawhah hian, tuna a sang palite chu a chanve chanve zoah puang phawt ang.

Ka star te

Gujarat Titans batsman Sai Sudharsan a hmuhnawm zel a. A kum telin a inkhel a puitling zel tih a hriat a. Indian Selector ho kawngkhar chu kik ring ve tawh tak a ni ngei ang.

Ball vawm lamah Afghan Noor Ahmed a ball ṭhuaivir vel dawlzo an la awm meuh lo a, hun rei tak selna kara khawsak tawh Md Siraj pawh drip chak chi khai ang maiin, tun IPL-ah chuan a vawm ṭha kher mai.

Batter-te vanram

Stadium tina pitch hmante hi batsman te tan duhtawka run vuak chhuahna tura ṭha a la ni vek a. Ball vawm khawl ho tan spin, turn leh swing han hmuh tur a la awm eih lo ti ila kan sawisual lo ang.

Mahse, hun an kal deuh anga, India nipui ṭhalvaekchar nisen sain a hna an rawn thawk chho anga, league stage chawhnu lamah chuan pitch lo upa ve deuh tawh nen, ball sawt muang leh sawt mumal lo zeuh zeuh kan hmu chho leh turah ngai ila. Bat leh ball indona balance tak a ni chho leh turah ngai ang.