Napoli chelhtu Bologna

Andre Frank Zambo Anguissa-a goal hmangin Napoli lamin hma hruai mah se, second half-ah Dan Ndoye chuan goal mawi hmangin a sut - Thawhṭanni zan Serie A inkhelah Bologna leh an mikhual Napoli te 1-1 in an inhnehtawk.

Kartawp inkhelah hmahruaitu Inter Milan an chak zo lo a, an chunga awmin point an hloh tih hre sa chungin Napoli an inlan, mahse an lo chelh ve tho avangin champion lai nena an inkar an sawr zim thei rih lo.

Napoli manager Antonio Conte chuan hrem vangin a naute a ho thei lo. Assistant coach Cristian Stellini hoa khel Naples club hian Stadio Renato Dall'Ara-ah dinhmun ṭha an luah hmasa, minute 18-naah goal an khung.

Bologna defender ball petchhuah fuh tawk lo dawngtu Zambo Anguissa chuan goalkeeper Lukasz Skorupsk thlengin a bum tlang vek a, an chunga awm Inter Milan an hnaih sawt a, an inkar chu point khatah an sawr zim zuai.

Mahse, mikhual team lamin an goal an venghim thei reng bik lo. Minute 64-naah goal mawi kan hmu, box sir lam aṭanga Jens Odgaard-a cross chu Ndoye chuan a kapkara kaltlang tir tur ang takin lang mah se, a kein a kheng lut zauh a, chiang zetin a goal.

Hun tawp dawnah Bologna zawkin chakna goal an khung teuh hle. Emil Holm-a'n a tauh lut teuh hle - a ball tauh hi Napoli goalkeeper Simone Scuffet chuan a lo dang hram, ball per hi goal aṭanga yard hnih leka hnaiah Santiago Castro chuan a pet lut hman ta lo a ni.

Napoli assistant manager Cristian Stellini chuan, "First half kha chu kan khel ṭha hle, goal kan nawr na em em bawk. Mahse, chawlhlawk hnu lamah kha chuan kan tha a zuai deuh a, goal kan chhuah hnuah phei kha chuan tho chhuak tur kan awm lo a ni ber.

"Bologna kha an beidawng duh lo a, anmahni mual a nih avangin an boruak pawh a ṭha hle. Chak duhin tum viau mah ila, tun ṭum atan chuan point insem hi kan khelh dan aṭanga chhut chuan a mak lo," tiin a sawi.

Napoli hian champion an la tum chhunzawm zel dawn a, match khat lekah an chunga awm Inter Milan an la nih rual thei. Bologna pawh point 57 hmuin palina an nih chhunzawm, season tharah Champions League khelh phak ngei an tum ang.