Magpies laka tlawm Foxes dinhmun a ṭha lo
Leicester City tan season thara Premier League khelh chhunzawm beiseina a tlem ta hle - Thawhṭanni zan inkhelah Foxes hi an mikhual Newcastle United lakah 3-0 in an tlawm.
King Power Stadium-a inkhelah a tir aṭangin Newcastle an chungnung a, minute hnihna lekah Jacob Murphy chuan a khung ṭan a, minute 11 a thlen chuan an goal hnihna a khung zui leh bawk.
Mikhual team an hmuhnawm a, mualneitu Leicester City tlarhnung an pherh thung - chawlhlawk hmain Harvey Barnes chuan a khung belh a, hun chanve an khelh tlin meuh chuan chak zawk tur a chiang tawh, a tawp thlengin thil a danglam zui tawh lo.
Eddie Howe enkawl Newcastle United hian League Cup an lak hnuah EPL match hnih an khel leh tawh a, an league match hnuhnung pahnihah Brentford leh Leicester City te an hneh, table-ah pangana dinhmun an luah chhunzawm.
Magpies manager Howe chuan, "A nihna tak sawi chuan League Cup kan lak hnua match dang khelh leh kha chetsual a hlauhawm, mahse ka naute hi an puitling tawh tih a takin kan hmu. Hmabak kan la neih hoah pawh ṭha takin kan chhunzawm ka beisei.
"A sang zual pali zinga tel phak chu kan duhthusam a ni a, chumi tihlawhtling tur chuan kan bei chhunzawm ang. Inrintawkna sang tak nen kan khel zel thei a nih chuan kan hmabak hautak anga lang pawh kan hlen chhuak thei ang," ti.
April 13, Pathianni zanah Newcastle United hian Manchester United an lo mikhual zui leh dawn a, chumi hnuah Crystal Palace leh Aston Villa te nen an inkhel leh ang, an hmabak pathum hi Howe chuan match pawimawh bik niin a sawi bawk.
Newcastle an kan san lai hian Leicester City erawh a hniam ber dawtah an awm chhunzawm, point 17 chauh an la hmuh avangin a him china awm Wolves an phak lohna chu point 15 a ni tawh a, an tan inhamtan a harsa tawh ang.
Foxes manager Ruud van Nistelrooy chuan, "Hun rei tak chhung chu dinhmun hnuaihnung takah kan ding tawh a, kan tan chuan thawh chhuah mai a harsa a ni. Player zawng zawngin ṭha takin khel se, result ṭha nei bawk ila ka duh.
"Tun ṭumah pawh khan goal kan chhuah hma avangin engkim kha a harsa chhunzawm vek a ni ber mai. Kan hmaa chona awm hi a hautak tawh dawn a, mahse kan hmachhawn ngei a ngaih avangin huaisen takin kan paltlang tur a ni ang," tiin a sawi.