Bopanna tan mellung pawimawh

Indian tennis khel thiam Rohan Bopanna chuan mellung hlu tak mai a phun - Monte Carlo Masters khelh laiah Bopanna hi doubles huangah a inlan a, an match hmasa berah a ṭanpui Ben Shelton nen hnehna an chang.

Bopanna hi kum 45 mi a ni tawh a, Grand Slam dawta inelna ngaihhlut Masters 1000 match bika chak thei upa ber a ni ta hial; mellung phun tur hian Francisco Cerundolo leh Alejandro Tabilo te chu darkar khat leh minute kua chhungin 6-3, 7-5 in an hneh.

Mipa tennis thuneitu sang Association of Tennis Professionals (ATP) chuan social media kaltlangin Bopanna-a record thar siam thu hi an tarlang a, nikum khan Grand Slam huanga hnehna chang thei upa ber nihna chu a lo chelh tawh bawk a ni.

A vanglaia nomawi tam tak lo chawi tawh Bopanna leh Shelton te hian, an match lehpekah chuan seeded pathumna Italian pair Simone Bolelli leh Andrea Vavassori te ṭangdun an hmachhawn leh ang.