Harsa takin Medvedev a chak

Season dang ang bawkin Daniil Medvedev tan clay court inelna chu a harsa leh dawn niin a lang - Monte Carlo Masters khelh laiah Medvedev hian Karen Khachanov hnehin a match hmasa berah fiahna a paltlang.

Court Rainier III-a inkhelah player pahnihten anmahni service pawh an hum lo nasa hle a, ṭum 17 ngawt an inchhuhsak tawn; inkhel inhnehtawk leh hmuhnawm takah Medvedev hi 7-5, 4-6, 6-4 in a vannei zawkah a ṭang.

Russian tlangval hian hnehna chang turin darkar hnih leh minute 51 lai a mamawh a, set thum chauh khel mah se Grand Slam match ṭhenkhat an khelh hun chhung nen a inang phak reng a ni.

US Open champion hlui Medvedev chuan, "Karen kha a ball vuak a nain service a nei ṭha em em bawk a, ka tan chuan dan kha a harsa a ni. Clay court a nih tawh hi chuan ka tan fimkhur a ngai zual ṭhin, kum dang ang bawkin a awlsam dawn lo," a ti.

Medvedev hian a match lehpekah chuan Alexandre Muller a hmachhawn leh ang. Muller hian inkhel dangah Camilo Ugo Carabelli chu 6-4, 6-4 in a lo hneh ve thung a, a hmabak chu a hautak tawh ang.

Monte Carlo Masters hi French Open inbuatsaihna zinga pakhat a ni a, ngaihhlut a hlawh ṭhin. Kuminah pawh world ranking 20 china awm 17 tehmeuh chu an inlan dawn; Novak Djokovic, Carlos Alcaraz leh Jack Draper te pawh an tel dawn a ni.

Thawhṭanni zan inkhel dangah, wildcard hmanga inlan Stan Wawrinka chuan fiahna hautak a paltlang zo lo. Grand Slam vawi thum champion tawh hi Alejandro Tabilo nen darkar hnih leh a chanve an inkhelh hnuah 1-6, 7-5, 7-5 in a chak lo.

France tlangval Gael Monfils chuan Hungarian player Fabian Marozsan chu 4-6, 6-1, 6-1 in a hneh. Matteo Berrettini pawhin Mariano Navone a hneh a, a hmabak chu Alexander Zverev a ni ang.