Bengaluru-in Odisha an ngam

Nilaini zan Indian Super League inkhelah Bengaluru chuan 3-0 in Odisha FC an ngam a, Deshorn Brown, Rahul Bheke leh Sunil Chhetri ten goal khat ṭheuh an khung. 

January transfer-a Bengaluru zawmtu Deshorn Brown-a'n ISL-a inkhel bul a ṭan hmasak berah goal a khung nghal a, Jamaica tana vawi 14 inlan thei striker hi Indian football-ah a tlangnel nghal hle. 

Major League Soccer club D.C. United tan pawha lo khel tawh Brown hian Bengaluru-ah hian kum khat leh a chanve atan contract a ziak a, season thar tawp thleng chu Bangalore club tan hian a khel dawn tihna a ni. 

Kum 29 mi Brown-a'n goal hmahruai a khung aṭanga minute hnih hnu lawkah Rahul Bheke chuan a khung ve leh a, Odisha an tho tawh lo. 

Khel ṭha em em mai Erik Paartalu chuan penalty a hlawh chhuak a, Australian midfielder zar zoin India captain Sunil Chhetri chuan penalty hi goal-ah a chantir. India chhuanvawr Chhetri hian tun season-ah match 14 khelin goal kua a khung leh der tawh a, kum 2015-a ISL a khelh ṭan hnuah ISL match 71 khelin goal 39 a khung tling ta a, assist vawi sarih a nei. 

Kum 35 mi striker hian ISL-a goal khung hnem ber Ferran Corominas (42 goals) a hnaih ta hle a, Indian zinga Chhetri hnaih bertu Jeje Lalpekhlua'n (23 goals) tun season-ah hliam vangin match a la khel lo. Bengaluru-in Odisha an ngam leh takah chuan table chung berah an awm mek a, match 14-a point 25 neitu club hi anni aia match khata khel tlem ATK leh FC Goa ten point khat chauhin an thlau tih erawh hriat tel a ṭha.

Sree Kanteerava Stadium, Bengaluru-a inkhelah Odisha tan Jerry Mawihmingthanga leh Bengaluru striker hlui Daniel Lalhlimpuia ten bul an ṭan a, Bangalore khawpuia hming lo chher tawh Lalchhuanmawia Fanai erawh bench lamah hun a hmang tluan thung.