Inter player-te Italy-ah an kir
Coronavirus vangin Inter Milan player-te'n Italy an chhuahsan a; chung zingah chuan player langsar Romelu Lukaku, Christian Eriksen, Victor Moses, Ashley Young, Diego Godin, Marcelo Brozovic leh Samir Handanovic te pawh an tel.
He thuziah lai thleng hi chuan Diego Godin tih loh player dang zawng hi chu Italy-ah an kir leh tawh a, Uruguayan defender pawh hi nimin lama let hman tura ngaih a ni.
Covid-19 buai hmaa Inter Milan-in match an neih hnuhnung berah Antonio Conte hote hian Juventus an hmachhawn a, 2-0 in a chak lo. Inkhelh zawh hnua an ngaihven erawh Juve defender Daniele Rugani-a'n coronavirus a vei thu a ni a, hemi hnu hian Paulo Dybala leh Blaise Matuidi ten an vei tih hmuhchhuah a ni bawk.
Juventus an hmachhawn miau avangin Lukaku pawh a fimkhur a, an khua Anversa, Belgium-ah let mah se a a chhungte bulah a awm lo. Amaherawhchu Italy dan angin an let aṭanga ni 15 chhung hi khung hran tur a ni a, Inter training-na hmun Pinetina training centre-ah an la kal thei dawn lo.
Inter Milan player khung hrante hian mimal training an neih a ngai a, coach Conte hriatpui ei siamtu hnen aṭangin ei tur an dawng ang. Inter hian match hnuhnung pahnihah an elpui Juventus (63 pts) leh Lazio (62 pts) te an hneh loh avangin point 54 hmuin pathumnaah an awm mek a, an chunga awmte ai hian match khatin an khel tlem thung.