Indian football buaina Hmasawn zawngin Indian football a kal em?
Season hmasa I League aṭanga an relegate chungin Aizawl FC-in season tharah I League an khel leh thei dawn a, Mizo mipui tan thu hriat nuam tak ni mah se India football kalphung mumal lohzia pholangtu a ni tel bawk.
All India Football Federation president Praful Patel-a'n I League-a Aizawl FC an inlan tur thu a puan ṭumin I League khelh châk club tam tak an awm a, chung ho tan chuan advertisement an chhuah tur thu a sawi!
Indian FA president sawi ang ngeiin AIFF-in adver-tise-ment an chhuah a, a chhang huai huaiin season tharah I League an khel ang - he ruahmanna ang hian Bengaluru FC, DSK Shivajians leh Bharat FC ten I League an khel tawh.
Eng nge a chhan?
Ram pakhat league sang ber khel turin advertisement chhuah a ngai miau si a, zawhna a piang lo thei lo.
India rama I League khelh hi sumdawnna rilru aṭang chuan a hlawk lo a, football atchilh tan lo chuan insen ngamna chi niin a lang lo. Hetiang a nih lai hian AIFF chuan kum 2014-a khelh ṭan Indian Super League chu kum 2018 aṭanga chuan India rama league sang ber nihtir an tum a, hun rei tak chhung sum hloh pawh inhuama I League khel ṭhin club-te chu a hniamk zawka dahin League One khel tura tih an ni thung.
He ruahmanna puanzar a nih hma daih tawh hian Bharat FC, Royal Wahingdoh leh Pune FC-te chuan AIFF ruahmanna hi an hre ru a, I League aṭanga inhnukdawkin a thlawna sum sen reng an duh lo.
AIFF-in an ruahmanna an puan rualin Sal-gaoacar chu I League aṭangin an inhnukdawk a, Sporting Goa leh Dempo dinhmun a chiang lo bawk. AIFF tan I League kalpui zel tur chuan season hmasa relegate Aizawl FC kohkir a, advertisement chhuah bawk loh hi chu tih dan tur a vang hle.
Hman aṭang tawhin..
Indian football-ah club inhnuhdawh hi thil thar a ni lo. Kum 2010 khan India club hlun Mahindra United chu I League aṭangin an lo inhnukdawk tawh a, Indian club zinga AFC Cup quarterfinal lut hmasa ber club chairman Alan Durante chuan, "Sum ang zawnga thlir chuan India rama football club neih hi a hlawk lo em em a ni," tiin an club an tihtawp tirh hian a lo sawi tawh.
Baichung Bhutia leh Sunil Chhetr- te club hlui JCT FC hi Indian football ngainatu tan chuan hriat loh chi an ni lo. Punjab club hian kum 2011 khan I League chhuahsana local league lama insawrbing an lo thlang tawh zawk bawk.
ISL dinhmun
AIFF-in India rama football inelna lian ber nihtir tuma hma a lak mek Indian Super League hi tun dinhmunah hlawhtling viau angin lang mah se ISL team pariatte hian kum khatah vaibelchhe 30 ṭheuh an hloh ziah anga ngaih a ni. Hetiang renga an kal chuan ISL club
ṭhenkhat hi chu an inhnukdawk duh leh maiin a rinawm!
ISL hi khawvela football league zingah a hmuna inkhel entu ngah pathumna a ni thei a, mah se hei pawh hi AIFF vang bawkin a buai lo ang tih a sawi theih loh - India ramah ISL league sang ber nihtir tuma hmalakna a awm miau avangin India rama club hlun tak tak an hel a, chu miin a nghawng tel chu fan-te an ni.
Heng boruak karah hian ISL club lamin tham lo takin I League club-te an sawi chhia a, chung zinga langsar bera chhal ngam chu Atletico de Kolkata an ni.
Kolkata club neitu zinga mi Saurav Ganguly leh Sanjiv Goenka-te chuan Kolkata Derby-a mipui nuai chuang ko khawm thei East Bengal leh Mohun Bagan-te na takin an sawisel a, anni tel lo pawhin fans an ngah tawk thu an sawi!
Mahse, ATK hotute ngaih-dan ang ngawt a lo ni hauh lo - season hmasa pahnih lama an home match an khelh apianga mipui 55,000 entu nei ziah anga chhut club hian tun season ISL-a an match hmasa berah fans 10,000 pawh an ko khawm thei lo!
ATK-in entu an neih tlem chhan hi East Bengal leh Mohun Bagan fan-ten #BoycottATK campaign an kalpui vang a ni a, Kolkata club hlun pahnih fan-te chu ISL en lo turin an ngen! I League club te hian an lungawi lohna an kalpui zel a nih chuan ISL hmabak hi a êng bik lo.
Patel-a thu thu!
I League-a Aizawl FC coach Jahar Das chuan India ram club inelna sang ber aṭanga an tlak hlim khan, "Season tharah I League kan khel leh ang tih hi 100% in ka chiang a ni," tiin Vanglaini palai hnenah a lo sawi tawh a, Indian FA a hrechiang tawk tihna a ni.
AIFF hruaitu lawk zinga pakhat, a hming tarlan remchang lo chuan, "AIFF chu Praful Patel-a thu thu a ni a, ani'n 'ni rawh se' a tih chu 'a ni' a ni mai a, kei ni tan lo sawisel theih a ni lo," tiin Vanglaini palai a lo hrilh tawh bawk!
Hetiang taka Indian football kalphung mumal lo kara Aizawl FC-in I League an khel tur erawh sawi hnawm theih a ni chuang lo a, Mizoram leilungah ngei foreigner leh India ram player ṭha ber ber kan hmuh leh dawn miau avangin Aizawl FC-in football ngainatute tana an hnathawh hi hriatreng a ni tawh ang.