Sena lansarh zanah Mumbai an chak

Thawhṭanni zan Indian Super League-ah Maharashtra Derby khelh a ni a, Mumbai City chuan khualmualah Pune City chu 1-0 in an hneh.

He inkhela goal awmchhun hi Matias Defederico khung a ni a, Argentina tana vawi hnih lo inlan tawh forward hian minute 69-naah he inkhela goal awmchhun hi khungin Manchester United striker hlui Diego Forlan siamsak a ni.

Mumbai City tan Lal-hmangaihsanga Ralte (Sena Ralte) chuan inkhel bul ṭanin hun tawp thleng khelmualah hun a hmang a, North Mualcheng tlangval hi Emerging Player of the Match-ah thlan niin player langsar pawl a ni.

Mumbai tan Lalchhuanmawia Ralte chu Bengaluru-in AFC Cup an la khelh avang leh a hliam enkawl a la ngaih bawk avangin a inlan thei lo a, David Lalrinmuana chuan bench lamah hun a hmang tluan thung. Pune City-ah Mizo pakhat chiah awmin Zodingliana Tochhawng pawh hian bench lamah a hun a hmang.

Zanin dar 7:00 hian NorthEast United an inlan dawn a, Kerala Blasters hnehtu club hian Guwahati-ah FC Goa an mikhual ang.

Mimal Lawmman

Fittest Player of the Match Pronay Halder, Mumbai City

Winning Pass of the Match Diego Forlan, Mumbai City

Emerging Player of the Match Sena Ralte, Mumbai City

Hero of the Match Matias Defederico, Mumbai City