Khawvel bumtu Tyson Fury

World heavyweight champion Tyson Fury chuan boxing a chawlhsan thu twitter kaltlanga a puan aṭanga darkar thum hnu lawkah a fiamthu a nih thu a sawi a, British boxer hian boxing chawlhsan a tum lo!

October 29-a Wladimir Klitschko nen an inhnek tur aṭanga inhnukdawk Fury hian, "Khawvela boxer ropui ber ni mah ila ka chawlh a hun ve ta," tiin twitter lamah a ziak a, kum 28-a upa boxer
thu chhuak hian boxing khawvel a barakhaih chiang hle.

Mahse, Fury chuan fiamthu a thawh mai a ni tih sawi lehin, "Chuti maia awlsamin kei miropui hi ka chawlh inring tak tak em ni? Ring chhunga cham zel turin he hmunah hian ka awm a, media ho hi eng ang chiaha laktlak loh nge an nih pholan nan fiamthu ka thawh a nih kha," a ti!

Klitschko nen an inhnek tur chungchangah rilru lam buaina a neih avanga inhnukdawk anga sawi Fury chuan ṭhat lam a pan zel thu sawi nghalin tun hma zawng aia ṭha zawka a lo kir tur thu a sawi.

Nikum November-a WBA, IBF, WBO leh IBO title hreng tura Klitschko hnehtu Fury hi July thla khan Ukrainian boxer nen hian inhnek nawn leh tura tih an ni a, mah se a ngalrek hliam vangin a inhnukdawk. October-a inhnek tura tih a nih hnuah a inhnuhdawh leh tak avangin World Boxing Organisation chuan Fury hi ni 10 chhung insawi fiahna hun an pe a, damdawi hman phal loh hmang anga puh a nih avangin November-ah a chungchang thu ngaihtuah a ni bawk ang.