Arsene Wenger-a Arsenal kum 20 chu...

"I harsatna tawrhte chu theihnghilh la, hun hlimawm i tawn lai kha mitthla ṭhin zawk rawh. Hun harsaah pawh club dinngheh pui tur chuan mahni club a ni tih hriat a ngai a, duhthlanna dik hmangin eng thutlukna pawh i siam a nih chuan club tana ṭha ber tur i ngaihtuah tur a ni," tiin Arsene Wenger chuan kum 20 chhung Arsenal a enkawl theih chhan a sawi.

Kum 20 liam ta khan Arsenal-in coach atan Wenger an lalut a, English manager ni lo hnam dang zingah Premier League club enkawl thei pathumna chiah a ni. London club a zawm theih avangin French manager hi a lar phah a - hei hian hetih hunlaia Wenger a dinhmun chu a sawifiah awm e. French pachal hian Gunners a enkawl tirh aṭang hian player 162 enkawl tawhin nomawi hrang hrang 15 a chawi tawh. Khawvel football manager ṭha hming sawi apiangin Arsene Wenger a hming sawi hmaih a thiang tawh lo!

Tun dinhmuna Premier League manager ṭanglai zingah Wenger hian a hna ngai a chelh rei fal hle a, Bournemouth manager Eddie Howe leh Burnley manager Sean Dyche te hi amah hnaih bertu an ni - manager pahnih ten an tluk lohna hi kum 16 leh thla khat zet a ni!

Premier League Manager of the Month atana vawi 15 an thlan tawh Wenger hian Arsenal hi inelna hrang hrangah match 1,130 a enkawl tawh aṭangin vawi 648 hnehna a chanpui a, ṭum 263 chu an khingpuite nen inhnehtawkin vawi 219-ah erawh an chak lo.

'Tu nge Arsene chu?'

Kum 1996 August thla khan Arsenal chuan an manger Bruce Rioch an ban a, a hmun ruak luah tura hming langsar tak chu khatih laia Barcelona player leh manager Johan Cruyff a ni. Dutch manager hi Gunners fan-te it rawn a ni a, a chanchin chauh pawh khawtlang media-te titi tui a ni.

Mahse, Gunners thuneitute lamin media leh mi nawlpui hmuh loh an hmu! North London club thuneitu hian khawvel mak tih turin 'Ni chhuahna lam' an hawi daih. Khawchhak kila Japan club vantlang pakhat Nagoya Grampus Eight enkawltu Arsene Wenger chu 22 September, 1996 khan an manager atan an lalut!

French pavalai, khatih laia kum 46-a upa Wenger kha English miten tu nge a nih an hre lo a, khawvela media ṭha bera an sawite thupui langsar tak pakhat chu 'Arsene who?' tih a ni.

Tunah chuan kum 20 chhunga a hnathawhte avangin a inkhelh hunlaia midfielder naran feet ruk leh inches thuma sang hi England mai ni lo, khawvel hmun dangah pawh ni se 'Tunge a ni?' inzawh a ngai tawh lo a, an rama football thuneitu sang ber Football Associatin ngei pawhin an ram team enkawl tura an awh leh it a ni mek.

Boruak dang

Kum 1997-98 season inbuatsaih nan khan Wenger hian a naute hi Austria-ah hruaiin a player-te chu zan lamah chhuah a phal sak - a ṭhenin zu an in a, a ṭhenin mei an zu bawk. Wenger chuan, "Player zawng zawngin zu an in a, mei an zu bawk! engtin nge hetiang chuan league nomawi kan chawi theih ang?" a ti.

Player-te rilru puthmang thlak a ṭul tih a hria a, khelmual pawn lama an nungchangin nghawng ṭha lo a neih zia a hmuh hmaih lo. Striker John Hartson chhuah tirin Nicolas Anelka a lalut a, winger Paul Merson pawh hnawlin a club hlui Monaco aṭangin Christopher Wreh, Gilles Grimandi leh Emmanuel Petit bakah Ajax aṭangin Marc Overmars a senglut bawk.

Hemi kum hian season bul ṭan ṭha mah se November thlaah an talbuai a, Highbury-ah Manchester United an hneh chiah chu hemi thla chhunga league match bika hnehna an chan awm chhun a ni. March thlaah Wenger hian, "League-ah kan la champion thei," tiin a sawi, mi nuih zat a hlawh.

Mahse, March thla hian Old Trafford-ah Man United hi 1-0 in an hneh a, hemi hnu hian a zawnin league-ah vawi kua hnehna changin an champion zui. 1998 FA Cup final-ah Newcastle United hnehin season khat chhungin nomawi pahnih a chawi ta! English ni lo hnam dang manager zingah hetiang dinhmun luah thei hmasa ber a ni.

'The Invincibles'

Khelh zat (49), chak (36), inhnehtawk (13), chak loh (0). Kum 2003 May thla leh 2004 October thla inkara Wenger leh a naute record hi engtikah mah theihnghilh a ni tawh dawn lo a, ṭhangthar ten an la hril fân ang.

Tlarhnungah Sol Campbell leh Kolo Toure te awmin Patrick Vieira leh Robert Pires te chu inkhel khaikhawmtu an ni a, tlarhma lamah Thierry Henry leh a kawppui Dennis Bergkamp ten goal khung kawngah harsatna an nei lo.

Arsenal hian 2003/04 season-a an league match hmasa paliah hnehna an chang vek a, an match riat naah Old Trafford-ah lenglutin hun tawp dawn lama Ruud van Nistelrooy-a penalty petin crossbar a pet hlauh a, goal lut loin an inhnehtawk - he match hi a zawna vawi 49 an tlawm loh chhunga an chak loh teuh ber ṭum a ni hial.

Hmabak

Arsenal hian 2003-04 season hnuah Premier League nomawi an la chawi leh lo a, Gunners fan zingah a hun a liam tawha ngaitu an awm nual tawh. 2013-14 leh 2014-15 te khan FA Cup chawi mah se league nomawi duha tuihal mek fan tam tak thinlung a hmin zan tawh lo deuh.

Wenger hian tun season tawp thleng daih contract a la nei a, a contract neih lai zah ṭhintu hian club dang a zawng a nih pawhin a hmu dawn tih chu a chiang. Real Madrid pawhin an sawm chhuah zawh loh khawpa rilru nghet hi FA hruaitute chil ti puttu a nih miau avangin a tan hna chu a vang lo tawp ang.

Chutih rualin Wenger hian tun season-ah champion ngei tumin squad a ti chhah a, season tawpa Arsenal a awmpuina hmun a zirin a hma hun hi a dangamin a rinawm. Eng nge lo thleng dawn chu hunin a hril ang chu...

Wenger-a nomawi chawi tawhte (Arsenal bikah)

FA Premier League (3) : 1997-98, 2001-02, 2003-04

FA Cup (6) : 1997-98, 2001-02, 2002-03,

2004-05, 2013-14, 2014-15

FA Community Shield (6) : 1998, 1999, 2002, 2004, 2014, 2015