Pakistan lehpelin Test-ah India an chungnung ber

India chuan Test cricket-a number 1 dinhmun luah turin Pakistan an pet chhuak a, he dinhmun an luah theih chhan hi New Zealand nen Test series an neih mekah 2-0 a hma an hruai tawh vang a ni.

Test series an khelh ṭan hmaa point 111-a Pakistan phak lo India hian September 22 khan New Zealand nen hian test series an khel ṭan a, match thum khel turin ruahmanna an siam.

Match hmasa ber hi Green Park, New Delhi-ah khelh niin India hian run 197-in hnehna an chang a, September 30 khan test match hnihna hi khelh ṭan leh niin India bawk an chungnung a, run 178-in hnehna an chang. October 8 hian test match thumna hi an khel leh ang.

Pakistan hi India hnuai chiahah awmin West Indies nen ODI series khel mekin test series match thum khelh tur an hmabak. India hian New Zealand nena series an khelh mek hi 3-0 in an la emaw, match tawp berah hian an inhnehtawk a nih pawhin number 1 an ni tlang rih tawh dawn a, Pakistan hian West Indies hi 3-0 a an hneh a nih pawhin India hi an umpha thei tawh lo.

Kum 2003 khan test ranking hi siam ve ṭan chauh a ni a, India-in an nekchhuah hmaa Pakistan-in number 1 dinhmun an luah hi an vawi khatna niin India tan tun hi test ranking-a pakhatna dinhmun an vawi li luahna a ni thung. Test ranking tih chhuah a nih dawn apiang hian kum li liam ta aṭanga team khelh dan en ṭhin a ni a, tun dinhmuna teh a nihnaah hian May 2013 - April 2015 inkara test match khelhin 50% point a pu a, April 2015 hnu lam zawng match hian 50% a pu bawk.

India hian test series khelh zawh a nih hnuah New Zealand hi ODI series an khelhpui lehnghal dawn a, match nga an inhmachhawn ang. ODI series match hmasa ber hi October 16-ah HPCA Stadium, Dharamshala-ah khelh ṭan a ni ang a, match tawp ber hi ACA-VDCA Cricket Stadium, Visakhapatnam-ah October 29 khian khelh ṭan a ni thung ang.