Klopp-a'n min hre lo - Balo

Mario Balotelli-a'n Liverpool a chhuahsan hnuah French club Nice tan match nga lekah goal ruk a khung tawh. English club-in man pawh nei loa a thlawna an chhuahtir Italian striker hian Liverpool boss Jurgen Klopp-a'n tu nge a nih a hriat chian loh thu a sawi.

Kum 26-a upa Balotelli chuan, "Klopp hian tu nge ka nih a hre lo,
ṭum khat chiah kan la inbia. Chumi ṭum chuan hmun danga kal chhuaka hnathawk turin min hrilh a, Reds-a kir leh turin min duh," tiin a sawi.

Italian striker Balo hian season liam ta khan loan-in AC Milan a zawm a, Serie A match 20-ah goal khat chiah khungin Cup-ah erawh match thumah goal hnih a khung. Manchester City striker hlui Balotelli chuan, "Milan leh Liverpool-a ka theihna ka lantir thei lo kha tu thiam loh mah a ni lo. Liverpool-ah khan khelmual chungah tihsual ka nei lo a, ka nungchang vangin buaina ka thlen lo. Amaherawhchu ka inhliam a, kha chu dan theih a ni lo. AC Milan-ah erawh inkaihhruaina a ṭha lo, club CEO Adriano Galliani tih loh chu hriathhiam an har a ni," tiin club pahniha a harsatna neih dan a sawi.

Italian striker hian French club Nice-ah harhtharna a chang mek a, Ligue-ah match thum lekah goal nga khungin Europa League match hnihah goal khat a khung bawk. Balotelli hi kartawp khan Ligue 1-a Lorient an hneh ṭumin chakna goal a khung zawhah yellow card vawi hnihna a hmuh avangin hnawhchhuah a ni. Amaherawhchu referee Olivier Thual berin a tihsual thu a sawi avangin hremna dang erawh Balo-telli hian a pumpelh beisei a ni.

Liverpool striker hlui Balotelli hi tun hnaiah che ṭha mah se Italian coach Giampiero Ventura chuan Spain hmachhawn tur team-ah a ko lo. Nice striker Balo chuan, "Ram tana khelh leh hi ka châk khawp mai, hun rei tak min koh loh chhan erawh ka phu loh vang a ni. Hun
ṭha ka ngah a, ram tan ka khel leh ang," tiin a sawi. Balotelli hi 2014 FIFA World Cup hnuah ram tan koh a la ni leh lo.