Furlough Scheme chu eng nge?
Coronavirus hri leng vangin sapṭawng thumal hriat ngai loh mak tak tak kan hriat belh a, tam tak tan hriatthiam harsa pawh a awm nualin a rinawm. Chutiang thumal zinga khawthlang sports media-ten an hman uar em em chu 'furlough scheme' tih a ni a, he scheme hian nghawng a neih len miau avangin hman loh tawp lah thil theih a ni lo.
Vanglaini pawhin 'furlough scheme' chungchang kan ziak fo a, chuti chung chuan he dan hrechiang lo leh eng tak nge a nih hre lo kan awm mai thei - vawiinah he dan hi kan bihchiang dawn a ni.
Company hnuaia hnathawkte chu 'furlough' an nih chuan chawlh lailawk pek an ni a, mahse he chawlh pek an nih chhung hian hlawh an la lo thung. Chutihrualin payroll-ah (hlawh pekchhuah tur list) erawh an awm reng a, hei hi an hna aṭangin ban an la ni lo tih entirna a ni.
'Furlough' hnuaia hnathawkte dah an nih chhan hi a tlangpui thuin company-in sum leh paia harsatna a tawh lai, insiamrem a tum laiin a ni tlangpui. Hnathawk ṭhenkhat ban chuang lo a, chawlh pe chunga an hlawh an pek loh chhung hian company chuan insiamrem dan a ngaihtuah ṭhin.
Tun hnaiah coronavirus hri lengin nasa takin infiamna khawvel pawh a nghawng a, a bik takin English football-ah club ṭhenkhatin he 'furlough scheme' hi an hman avangin sawi a hlawh lehzual hle.
United Kingdom sorkar chuan coronavirus hri leng vanga company-ten an hnathawk chhawr lai an chawlh lailawk tir (furlough) te puihna turin Coronavirus Job Retention Scheme a siam a, he dan hnuaiah hian hnathawhna aṭanga hlawh la loa chawlh lailawk tirte chu an hlawh 80% chin a tumsak a ni.
Chutihrualin sorkar hian sum tum theih chin a bi tuk tho a, £2,500 (Rs. 2,37,042) aia tam erawh a tumsak thei chuang lo. Chumi awmzia chu an hlawh lak ṭhin aṭanga 80% a tumsak hian an hlawh 80% kha thla khatah £2,500 aia a sang a nih chuan sorkar hian a tum theih chin £2,500 chiah hi a pe ang.
UK sorkar ruahman dan chuan he scheme hi March aṭanga chhiar ṭanin thla thum tal daih tura ruahman a ni a, Premier League club ṭhenkhat chuan he scheme hi zawm vein an hnathawkte hlawh pe lo tawp loin 20% an pe thung - hemi scheme zarzo hian an non-playing staff-te chuan 100% hlawh an lak theih phah a ni.
Premier League club zingah chuan Newcastle United, Tottenham Hotspur, Bournemouth leh Norwich City-te chuan he scheme hi an hmang a, Liverpool chuan zawm ve an tum thu sawi mah se sawiselna nasa tak avangin Premier League hmahruaitu hian an thutlukna hi an sut.
Coronavirus Job Retention Scheme hi a duh apiang tan hman theih ni mah se sumdawnna tenau ho pual deuha tih a ni a, khawvela football league hausa bera club ten an hmang ve hian sawiselna a tawk nasa hle - a awm lo hran lo.