Champhai-ah Mizoram football inelna sang ber

Mizoram Premier League Season 5 chu October 6-7 hian Chhangphut Field-ah khelh a ni dawn.

Mizorama football inelna sang bera round pawimawh tak Champhai-in an chang thei hi an vannei a, Aizawl lama tualchhung football tuiten 'ka en châk asin le' an tih kha Champhai mipuiin 'kan lo en ang e' tiin an chhawn e!

A nghawng a lian

Tun season MPL ṭan hmain Champhaiah Round 7 khelh a ni dawn tih puan lawk a ni a, khatih hunlai khan tun ang em em hian Chhangphut Field-a inkhel tur hi a pawimawh dawn tih hriat a ni lo.

Round 7-a inkhel turte hi chung leng - Bethlehem VT, Chanmari FC, Chanmari West, Aizawl FC leh hnuai leng - Zo United, Chhinga Veng, Ramhlun North, Dinthar FC ah ṭhenhran theih a ni. Champhaia inkhel hian table-ah nghawng lian tak a nei ang.

October 6 tlaiah 'top of the table clash' en tur a awm dawn a, hneh loh la tawng lo Bethlehem Vengthlang leh pahnihna Chanmari FC te an inhmachhawn dawn. Hemi hma hian I League club Aizawl FC leh tun hnaia che ṭha tak Chanmari West FC an inkhel ang.

October 7-ah MPL kaithar pahnih Ramhlun North leh Chhinga Veng FC-te an inkhel dawn a, tun hnaia an result
ṭhat loh avangin chak lo zawk an awm a nih chuan semifinal lam ngaihven aiin relegate loh an tum hmasak phawt a ṭul ang.

Tlai lamah table mawnga awm Dinthar FC-in a chak ve ngei tawh an tum dawn, MPL1 champion khingpui tur erawh khelmual chhung leh pawna che ṭha mek Zo United an ni.

Goal 50-na

MPL5 khelh mekah match 24 aṭangin goal 48 a lut tawh a, match tinah goal hnih lut ang zel a ni. Statistics hmanga thlir chuan Champhai match hmasa berah goal 50-na a lut nghal dawn tihna a ni.

Tun season-ah penalty vawi khat chiah pet a la ni a, Aizawl FC defender Lalramchullova-a'n minute thumna lekah penalty hmangin Zo United lamah goal a khung - tun season-a goal rang ber a la ni bawk.

MPL5-ah own goal a la awm lo a, MPL season li neih tawhah own goal vawi 15 a awm tawh. Season liam ta kha own goal tlem ber ṭum niin pahnih chiah a awm.

ROUND 7

October 6, Ningani

12:00 PM Aizawl FC Vs Chanmari West

02:30 PM Chanmari FC Vs Bethlehem VT

October 7, Zirtawpni

12:00 PM Ramhlun North Vs Chhinga Veng

02:30 PM Dinthar FC Vs Zo United

Team Dinhmun

# Team Pld W D L GF GA GD Pts

1 Bethlehem VT 6 5 1 0 7 1 6 16

2 Chanmari FC 6 3 2 1 10 5 5 11

3 Chanmari West 6 3 1 2 9 5 4 10

4 Aizawl FC 6 3 1 2 7 4 3 10

5 Zo United 6 1 3 2 1 4 -3 6

6 Chhinga Veng 6 1 2 3 7 10 -3 5

7 Ramhlun North 6 1 1 4 3 8 -5 4

8 Dinthar FC 6 0 3 3 4 11 -7 3