FIFA World Cup-ah team 48?

FIFA president Gianni Infantino chuan World Cup-a team tel thei zat chu 48-ah tih pun a duh thu a sawi. Infantino hian FIFA president dinhmun a chuh lai khan World Cup-a team tel zat 32 chu 40-a tihpun a tum thu a lo sawi tawh a, tunah a aia tam zawk 48-a tihpun a duh thu a sawi leh ta a ni.

Infantino-a ruahmanna ang chuan World Cup group stage khelh a nih hmain knockout round khelh a ni ang a, hetah hian team 32 an inhmachhawn ang. Team chak lo zawk 16 chu hnawhchhuah an ni ang a, team 16 dang hian group stage an lut thung ang. Group stage-ah hian seeded team 16 chu a tling sa an ni ang a, knockout round aṭanga lut team 16 nen last 16 luh an inchuh ve leh ang. Hei erawh Infantino ruahmanna mai a ni a, nakkum January-a FIFA-in
ṭhutkhawm a neih hunah thutlukna siam a ni chauh ang.

February 2016-a FIFA president a thlan tlin Infantino chuan, "A awmzia takah chuan tuna kan kal ang hian team 32 thoin World Cup tak tak chu an khel ang a, team 48-in World Cup ropuina an tem dawn thung tihna a ni. FIFA-in kan tum ber chu khawvel pumpuia football-in hma a sawn theih nana hmalak a ni a, chumi atan chuan World Cup hi kan thil neih len ber a ni. Inelna a nihna ai mahin khawvel huap intawhkhawm a nihna hi a ropuina chu a ni," tiin a sawi.