Raheem Sterling aiawh turin Townsend

England manager lailawk Gareth Southgate chuan hliam vanga ram tana inlan thei lo tur Raheem Sterling aiawh turin Crystal Palace winger Andros Townsend chu a ko. England hian Malta leh Slovenia chu World Cup qualifier an khelhpui dawn a ni.

Kum 25-a upa Townsend hian ram tan match 11 khel tawhin goal thum a khung a, mah se Euro 2016 khel tura Roy Hodgson-a koh zingah khan a tel lo. Nipui transfer-ah khan Newcastle United aṭangin Palace hi pound maktaduai 13-in a zawm a, league match sarih an khelh tawhah la inlan kim vekin ram tan koh a nih phah ta hial.

Burnley defender Michael Keane chu England squad-ah hian a vawi khat nan koh a ni bawk a, kum 23-a upa defender hi hliam vanga inhnukdawk Stoke City full back Glen Johnson aiah koh a ni. Manchester United Academy chhuak defender hian Southgate-a enkawlna hnuaiah England Under-21 tan vawi 16 a lo khel tawh.

Hetihlai hian Manchester City forward Raheem Sterling hliam chungchangah erawh City leh England-in thuthar chhuah engmah an la nei lo thung.