Chhangphut Field-ah Nigerian international midfielder hlui

Aizawl FC coach K. Malsawmkima chuan, "Benjamin kha Champhaiah chhawr kan duh avangin a la inpeih lo chungin kan luhtir a ni," tiin Thawhṭanni tlaia Ramhlun North an hneh zawhah Vanglaini palai a hrilh.

MPL champion lai coach Mala berin a sawi lawk tawh avangin Nigeria senior team tan pawha inlan tawh Benjamin Eniwo Onome chu Chhangphut Field-ah Chanmari West hmachhawn tura a inlan ngei rin a ni.

Kum 23-a upa Benjamin hian Ramhlun North an hneh ṭumin minute 62-naah William Lalnunfela thlakin Lammualah a inlan tawh a, Nigerian midfielder luh hnu hian AFC hi MPL kaithar Ramhlun North lakah 2-1 in an chak.

Benjamin hi a match hmasa berah amah ang bawka foreign player Bright Middleton Mends-a'n hming ṭhatna a chhuhsak a, Mizorama cham rei tawh zawk Ghanaian forward Mends hi man of the match a thlan a ni.

MPL danah a rualin foreign player pahnih chhawr theih a nih avangin AFC boss Mala hian a duh chuan a rualin Benjamin leh Mends hi a chhawr thei ang.

Aizawl FC thuchhuakin a tar-lan danin Benjamin hi World Cup qualifier-ah African football power-house tiha sawi
ṭhin Nigeria tan a inlan tawh a, Champhaiah en bik a hlawh a nih pawhin a mak lo ang.