Nadal chak nuamsa

Rafael Nadal chuan nimin khan China Open-a a match hmasa ber khelin Paolo Lorenzi lakah game hnih chauh hloh chungin second round a inhlangkai. Grand Slam vawi 14 champion tawh Nadal hi Beijing-ah hian a khel ṭha hle a, a khingpui Italian tlangval hi darkar khat chhung lekin 6-1, 6-1 in a sawp.

Kum 30-a upa Nadal hian hliam a neih ngun avangin kuminah nomawi pahnih bak a la chawi lo a, tunah hian ATP ranking-ah point 4,940 hmuin palina a ni mek - a hnunga awm Kei Nishokori (4,875) leh Milos Raonic (4,510) te nen an inthlau lo hle.

November thla khian O2 Arena-ah mipa ranking-a a sang pariatten 2016 ATP World Tour Finals an khel dawn a, he huna inlan ngei turin Nadal hian karleh hian Sanghai Open khelh zui a tum bawk.

Inkhel dangah seeded parukna Lucas Pouille pawhin second round lut turin harsatna a tawk lo, world number 16 hian Chinese Taipei tlangval Yen-Hsun Lu lakah minute 49 chhung lekin 6-1, 6-2 in hnehna a chang.