Chelsea legend Bonetti a thi
Premier League club Chelsea legend Peter Bonetti chu rei tak chhung a damloh hnuah kum 78 mi niin a thi a, Chelsea chuan, "Players kan neih tawh zinga ropui ber pawl chu kan chan ta," tiin 1960 chhoa an goalkeeper ropui chu an thlah.
'The Cat' tia hminglem an pek goalkeeper hian 1959-ah khan a professional career ṭanin Chelsea-ah bul a ṭan a, kum 1975 thleng kha Blues tan a khel - Chelsea aṭang hian USA-ah kalin St Louis Stars tan a khel a, kum khat lek a khelh hnuah Chelsea-ah bawk hian a kir leh a ni.
Chelsea tan 1979 thleng a khelh leh hnuah Dundee United leh Woking FC tan a khel leh a, 1987-a inkhelh a chawlhsan hnuah Chelsea leh England tan goalkeeping coach hna te a thawk a, Kevin Keegan thachhang dawltu niin Manchester City, Newcastle United leh Fulham-ah te a thawk bawk.
London club tan hian vawi 729 inlanin Chelsea tana inlan hnem lamah club captain hlui Ron Harris chiah a phak lo a, January 2014-a Petr Cech-a'n a record a rawn khum hma khan Chelsea tana clean sheet nei hnem ber a ni reng ṭhin.
Blues-a a awm chhung hian League Cup (1), FA Cup (1) leh UEFA Cup Winners' Cup (1) nomawi a chawipui bakah second division aṭangin vawi hnih top flight football-ah a inhlankaipui bawk.
England tana vawi sarih inlan thei Peter hi kum 1966-a Three Lions-in World Cup nomawi an chawi khan squad-ah a tel a, mahse goalkeeper ropui Gordon Banks vanglai a nih avangin vawi khat mah a inlan lo thung.
Chelsea chuan, "Kan club miropui zinga a telna chhan hi zawh nawn kan ngai lo. Stamford Bridge khelmuala mak ti taka fan-te lo siam a, harsatna tam tak lo paltlang tawhtu kha a ni a, Chelsea chhungkua chuan Peter-a chhung leh ṭhiante a tawrhpui takzet a ni," tiin thuchhuah an siam.
FA Chairman Greg Clarke chuan, "Goalkeeper ropui tak a ni mai lo a, English game-a mi langsar a ni. Naupangte nichunga 1965 League Cup nomawi an chawi nana Leicester City laka a game hmuhnawm tak ka en te kha ka la hre reng a ni," a ti.
England tana inlan hnem ber goalkeeper Peter Shilton chuan, "1970 World Cup squad-ah kan awm ho a, keini ang naupang tan chuan kan chung en em em, mi ropui bik a ni. Chawl hahdam rawh Goalie," tiin a thlah a, Chelsea legend John Terry chuan, "Chelsea legend leh hero, ka thinlung hi a tliak a ni," tiin a thlah ve bawk.