Miranda-a'n AFC Pro Licence nei thar
Indian Super League season liam taa FC Goa coach lailawk dinhmun chelhtu Clifford Miranda chuan AFC Pro Diploma Coaching Course a zo a, Goan coach hian sawmtu a neih phawt chuan season thar aṭangin ISL club a enkawl thei dawn tihna a ni.
Player a nih laia India tana vawi 45 inlan thei Miranda hian Uzbekistan Football Association (UFA) huaihawtna hnuaiah licence hi a nei thar a, coach 21 zetin kum hnih chhung zir ngai course hi ti mah se pali chiah an hlawhtling - coach pali zingah Indian coach hi a tel.
Indian Super League-in dan thar a duang a, tun hmaa Indian coach tana ISL club enkawl beiseina awm lo ṭhin kha tih bo a ni tawh - AFC Pro Licence nei chuan ISL club a enkawl theih tawh a, he licence nei Indian coach tlemte zingah Miranda hi a tel ve ta.
Dempo vanglaia an player pawimawh ni phak Miranda bakah hian Bino George, Robin Charles Raja, Derrick Pereira, Thangboi Singto, Khalid Jamil, V Soundararajan, Henry Stanly Rozario (Aizawl FC coach), Mariano Dias, Syed Sabir Pasha, Naushad Moosa, Savio Madeira, Santosh Kashyap leh Herring Shangpliang te chu Indian coach zinga AFC Pro Licence nei an ni.