Fernandes-a'n inkhelh leh thuai a beisei
Eintracht Frankfurt midfielder Gelson Fernandes chuan Bundesliga lama training an nei leh thei ta chu player-ten nuam an tih thu a sawi a, May thla tawp lamah chuan Bundesliga khelh chhunzawm a beisei thu a sawi bawk.
Bundesliga hi March 31 khan tihtawp lailawk a ni a, tuna thu awmsaah chuan April 30 thleng chawlh tur a ni - Covid-19 hri len dan a zirin hei erawh an pawh sei leh mai a rinawm thung.
Fernandes chuan, "Bundesliga season kan ṭan leh hunah pawh entu awm loa kan tih ka ring. Ka ngaihdanah chuan May thla tawp lam a nih ka ring bawk," a ti a, June, July, August chho nghaha mipui 50,000 bawr vel hmaa inkhelh leh rik ngawt chu a fuh loh tur thu a sawi bawk.
Eintracht Frankfurt player pathum pali velin coronavirus an kai thu Fernandes hian a sawi a, ni 14 chhung chu an vaia inkhunghran an mamawh hial thu a sawi.
Bundesliga club-te hian training ṭan ngawt mah se an fimkhur hlawm hle - Frankfurt player-te hi pathum/pali a inṭhen hrangin an training a, player-te hi an intawk fuh lo.
Ball in pass leh shooting chu an zir ber a ni a, dressing room-ah pawh room pakhatah player pathum chauh zel awm an phal. Fernandes chuan, "Khelmuala kan let leh thei ta hi a nuam takzet. Mahse, kut kan sil reng a, fimkhur theih dan ang berin engkim kan la kalpui a ni," tiin a sawi.
Bundesliga chief executive Christian Seifert chuan league chu May thla tirah khel leh tura ruahmanna an neih thu a sawi thung a, June thla tawp lamah match kua khelh tur la awm chu khelh zawh hman a beisei.