Sharapova tan kâwl a êng

Maria Sharapova chu beisei aia hmain tennis court chhungah a hmel kan hmu leh dawn. Court of Arbitration for Sport (CAS) chuan Thawhlehni zan khan an thutlukna puangin kum hnih inkhel thei lo tura hrem tuar mek Russian star hi an hrem hunchhung chu thla 15 atan an tih tawi sak.

Infiamna lama thubuai ngaih-tuahtu sang ber CAS thutlukna ang chuan Grand Slam vawi nga champion tawh Sharapova hi 26 April, 2017 khian an hremna a tawp dawn tihna a ni a, vawi hnih a champion tawhna French Open 2017-ah a inlan thei dawn tihna a ni.

Kum 29-a upa Sharapova chuan, "Ka hmangaih min lak sak angah ka ngai hman a, beisei aia hmaa ka lo kir thei tur hi ka lawm hle. Tennis hi ka ngainain ka hmangaih a, ka ngai bawk. Court chhunga ka lo kir leh hun tur chu nitin hian nghakhlel takin ka lo thlir zel dawn a ni," tiin hrem a nihna an tih tawi sak tih a hriat hnuah a sawi.

Buaina chu...

Kumina Grand Slam hmasa ber Australian Open-ah khan Sharapova hian quarterfinal thlengin January 26 khan khatih laia world number 1
Serena Williams a hneh lo. February thla tir khan meldonium a hmang tih hmuh chhuah zui a ni.

Russsian star hian lung (heart) damdawi atana an hman ṭhin meldonium hi tun hma lam kum 10 liam ta aṭang khan a hriselna vawn nan a ei ṭhin thu a zep lo a, "Hman phal loh zingah a tel tih ka hre lo," tiin a sawi bawk.

Latvia rama damdawi siamtu company pakhat Grindeks siam
chhuah Meldonium damdawi hi tun hma chuan infiammite tan hman phal loh zingah telh a ni ngai lo a, kumin Janury thla aṭang khan World Anti-Doping Agency (WADA) chuan hman phal loh zingah a telh chauh. He damdawi hi eng chen nge mihring taksaah a cham rei tih finfiah a la ni lo bawk - chetsual palh theihna chu a ni ngei mai.

International Tennis Federation chuan June thla khan Sharapova hremna hi ti chhuakin kum hnih chhung inkhel thei lo tura tih a ni. Hremna hi a inkhelh hnuhnung ber January 26 2016 aṭanga chhiar ṭan niin January 25, 2018 thleng tura tih a ni. He hremna hi kaltlang pui ni ta se chuan Grand Slam pariat a khel dawn lo tihna a nih bakah kum 31-a upa a lo ni tawh dawn a, a tan court chhungah tun hma anga inlan a harsa tawh ang.

World number 1 hlui hian duh reng vang ni loa a thil tihsualah dikna lantir tumin CAS hnenah a zualko a; French Open, Wimbledon, Rio Olympic leh US Open khel thei loa rilru hrehawm taka a awm hnuah tunah chuan thu lawmawm lam a nei ve leh ta a ni.

Ka hlim - Maria

Grand Slam vawi 22 champion tawh Serena a hneh loh hnua la inkhel leh miah lo Sharapova chuan CAS-in hremna an tih tawi thu an puang chu a hringnuna a hlim ber ni pakhat a nih thu a sawi chhuak.

Sharapova chuan, "Kumin March thla aṭang khan ka hringnuna hun harsa leh hautak ka hmang chho a, nakkum April thlaa ka lo kir tur thu ka hriat ni hi ka hun hman tawha ka hlim ber ni pakhat chu a ni leh ta," a ti. Hetihlai hian thla 15 hremna a tawrh dawn tho avang hian Grand Slam pathum a khelh loh tawh bakah, season thara major tournament hmasa ber chu a khel thei dawn chuang lo.

Sharapova chuan sawi chhun-zawmin, "Tun hnai kum 10 liam taa ka lo ei ṭhin tawh kha ei phal loh zingah a tel tak thut avangin a mawhphurtu chu ka ni ngei a, ka thiam loh a ni. Mahse, he thil thleng aṭang hian infiamna kawng hrang hranga thuneitute hian an player-te hnenah thuthar an hrilh ṭhat phah ngei ka beisei. ITF pawhin tennis player zingah ka tawrh ang tuar an awm tawh loh nan a fimkhur phah ngei pawh ka duh," tiin a sawi.

Hetihlai hian ITF lam chuan thuchhuah siam ve nghalin, "Kan kalphung hi ennawn ṭhin a ni a, kan ennawn zel bawk ang. Player tu pawhin dan a bawhchhiat avanga an chunga thuneitu an mawhpuh theih loh mai lohna turin thuthar inhrilhfiahna neih hi kan tihtur niin ṭha taka kalpui zel pawh a ni ang," an ti.

Thu lawmawm dang

Tennis ngainatute hmuhnawm tih leh player-ten hlawhtlin an châkna Wimbledon 2004-ah ngei mai khan, khatih hun lai khan kum 17 chauha upa ni chungin Sharapova hi a champion a, hemi hnu hian a hawikir tawh lo. Season khat chhunga an khelh kual ṭhin Grand Slam paliah champion kim vek tawhin Roland Garros-ah phei chuan nomawi vawi hnih a chawi tawh.

A inkhelh thiam bakah a hmel--
ṭhat leh pian nalh vanga mite hriat hlawh Sharapova hi tun hnai kum 11 chhung zet chu Forbes-in khawvela hmeichhe infiammi sum lalut hnem berah a thlang a, boruak ṭha lo a neih hnuah Serena-i'n a rawn khum ve chauh.

WADA-in thiam loh a chantir a, ITF-in hremna a puan hlim khan amah leh sumdawnna lama a thawhpui ten an inkar an titawp lailawk deuh vek. A thuamhnaw hak tur siamtu Nike chuan March thla khan an thawhhona an ti tawp a, June thla a lo herchhuah kha chuan a lamah an ṭan thu an sawi leh tawh - Nike hian an tisual lo a, an kalsan lo hi an inchhir lo bawk ang.

Nike chuan, "Nakkum April thla maia court chhunga Maria-i a rawn kir tur hi kan lawm a, thawhhona ṭha kan neih chhunzawm ngei kan beiseiin hlawhtlinna chang chhunzawm turin duhsakna kan hlan," an ti.

Racquet siamtu lar Head chuan an player hrem an nih lai pawh khan an contract pawh sei an duh thu an lo sawi tawh a, Head chairman leh chief executive ni bawk Johan Eliasch chuan CAS thutlukna an hriat rual hian lawmpuina thu a sawi nghal bawk, an boruak a chhe zui lo tawp ang tih a chiang.

Car manufacturer lian leh hming-thang Porsche leh Swiss ram mai ni lo khawvel puma sana siam langsar berte zinga mi Tag Heuer te pawhin Sharapova nena an inkar hi ni rei lote hnua an ngaihtuah nawn leh dawn thu an sawi leh der tawh, thu lawmawmin a zui zel rih tura ngaih a ni.

Sharapova Sulhnu

2001: A career-a a match hmasa ber a khel.

2002: A vawi khat nan WTA Tour event pahnihah a inlan.

2003: WTA title a lak ṭan kum niin Tokyo Open leh Quebec City-ah te a champion a, Grand Slam tournament paliah a vawi khat nan a inlan vek.

2004: Serena Williams hnehin Wimbledon-ah a champion a, a major title hmasa ber a ni nghe nghe.

2006: Justine Henin hnehin US Open-ah a champion.

2008: Australian Open-ah a champion.

2012: French Open-ah champion in Grand Slam paliah a champion kim chiah.

2014: French Open-ah champion lehin tun dinhmunah a Grand Slam title lak hnuhnun ber a la ni rih.

2016 (March): Australian Open-a Serena Williams a hneh loh hnuah damdawi hman phal loh 'meldonium' a hman thu a sawi chhuak.

2016 (October): Kum hnih chhung inkhel thei lo tura hrem a nihna chu CAS-in thla 15 atan a tih tawi sak.