Deschamps-a'n Pogba a chhan

France coach Didier Deschamps chuan Manchester United a zawm hnua beisei phak lo Paul Pogba chungah buaina a neih loh thu a sawi a, kum 23-a upa midfielder chuan ngai a awh leh thuai tur thu a sawi.

Pogba hian nipui transfer bazar-ah khan khawvela player manto ber ni turin Juventus aṭangin United chu pound maktaduai 89-in a zawm a, France international hian tun thleng chuan a man phu tawkin a la khel chhuak lo.

Mahse, France coach Deschamps chuan, "Pogba hian a team a thlak a, a khelhpui ngai loh player te nen an khelh ho avangin insiamrem nan hun a mamawh a ni. Paul te ang player-ah hi chuan player naran aiin kan beiseina a sang zawk lo thei lo a, pangngai taka a khelh pawn midang aia khel ṭha chungchuang turin kan beisei ṭhin a ni," a ti.

Deschamps chuan sawi chhun-zawmin, "Paul hian match tinah assist nei se kan duh ni maiin ka hria, a laka kan beiseina hi a sang mah mah ve bawk a ni. Mahse, amah ber hian a buai phah lo a, a duh chu a hre-chiang em em a ni," tiin France team-a a player pawimawh chu a chhuang hle.

Hetihlai hian khelmual pawn lam buaina avanga Euro 2016 khelh zawh taka koh loh Karim Benzema chuan an ram a hmangaih thu leh France tana inlan leh thuai a châk thu a lo sawi ve bawk a, Deschamps erawh a dinna ngaiah a ding thung.

Kum 47-a upa manager chuan, "I ngaihdan eng pawh ziak la, i duh duh thu sawi la, ka ngai pawimawh lo. Media hmaa kan thusawi leh khawsak dan vangin player ka koin ka koh loh phah lo," tiin a sawi.