Rooney-a'n Southgate a ringtawk

England captain Wayne Rooney chuan Sam Allardyce ban a nih avanga manager lailawk Gareth Southgate a rintawk thu a sawi a, England Under 21 coach tan tun hi senior team enkawl tura a ṭhat tawk zia pholanna remchang a nih thu a sawi.

Rooney chuan, "Gareth-a tan chuan tun hi a theihna pholanna remchang tak a ni a, player zingah U21 lama a lo enkawl tawh an awm nual avangin heng player-te tan hian Gareth hi a
ṭangkai dawn a ni. A duh dan ang taka khelh chhuah kan tum ang a, chu chuan eng chen nge min thlen dawn chu kan hre thuai ang," a ti.

Kum 46-a upa Southgate hian match li chhung England team hi a enkawl dawn a, Inrinni khian Malta nena World Cup qualifier khelin a hna a thawk ṭan ang.

Thamna sum vanga bang ta England manager Big Sam chungchang sawi nghalin Rooney chuan, "Heti maia Sam thlah a ngai hi a zahthlak takzet a ni. Sam khan England a enkawl tirh khan a phur zia chu mi zawng zawngin an hre vek a, kha a phurna khan player-teah pawh phurna nasa tak min siamsak. Heti maia a kal a ngai hi pawi ka ti a, amah pawh a inchhir tawh khawp ang," tiin a sawi.

Manchester United starting XI-a a hmun hloh tawh Rooney hi England tan koh a ni zel ang em? tih chu tun hnaia zawhna awm a ni a, Southgate chuan captain a nih chhunzawm zel tur thu hi a tichiang tawh a, Euro 2016-a midfield-a khel striker hi a position khelhna tur erawh sawi a la ni lo.

Hetihlai hian tun hnaia Eng-land buaina avangin Alan Shea-rer chuan an ram team chu nuih-zatthlak mai an nih thu a sawi a, England left-back Danny Rose chuan an ram captain hlui thusawi hi a pawm pui thu a sawi!