La Liga-ah Indian rawlthar

Indian rawlthar striker Ishan Pandita chuan La Liga kaithar club Leganes tan season khat chhung khel turin professional contract a ziak a, Indian player zinga La Liga club zawm hmasa ber a ni.

Kum 18-a upa striker hian senior team tan contract ziak mah se Under 19 tan a inlan phawt ang a, a ṭul dan a zirin senior team-ah hian koh theih a ni dawn. Club vice president Felipe Moreno chuan Ishan hi Leganes khelmual Butarque stadium-ah contract a ziahpui a, jersey nen media hmaah a tlangzarh nghal bawk.

Season hmasaa Spanish second division club UD Almeria U18 team tana khel Ishan chuan, "Spain-ah hian La Liga club tana ka khelh theih beisei chungin kum thum zet hun ka hmang tawh a, zinkawng hautak tak ni mah se a tawpah chuan ka hrehawm tawrh zawng zawng khan lawmna min pe a ni," tiin Leganes a zawm thei chu a hlim hle.

La Liga-a 11-na dinhmun luah mek Leganes U19-a foreign player pahnih zinga pakhat zawk Ishan chuan, "March thla khan Getafe-ah trial neiin hun ka hmang a, mah se second division lamah an relegate tak avangin ka zawm lo. Ka duh ber chu La Liga team zawm a a ni a, Leganes hi an lo lang ta a ni, " a ti.

Leganes academy director Jorge Broto Benavente chuan, "Ishan kan duhna em em chhan pakhat chu a pian a ṭha em em a, goal khung a thiam bawk. Senior team tana a khelh theih hun tur a la sawi theih lo a, rangkachak hlu tak a mawina tak tak pho chhuak tura chher hriam ngai ang hi a la ni," tiin an striker thar chu La Liga khel tur chuan enkawl a la ngaih thu a sawi.