NorthEast chakna Alfaro

Indian Super League khelh mekah NorthEast United-in match hnih khelin vawi hnih hnehna an chang ta - Thawhlehni zan khan Highlanders hian team ṭha zawka ngaih FC Goa chu mikhualin 2-0 in an barakhaih a, Uruguay tan pawha lo inlan tawh striker Emiliano Alfaro chuan NorthEast tan goal hnih hi a khung a ni.

NorthEast United coach Nelo Vingada chuan, "Game harsa tak khel mah ila hnehna kan chan theih avangin ka lawm a, kan goalkeeper Subrata Paul kha a che ṭha takzet a ni. FC Goa player zingah level sang tak thlenga lo khel tawh an tam a, 2-0 a chak loh hi an tan chuan pawm thiam a harsa ve ngawt ang," tiin hnehna an chan avanga a lawm thu a sawi.

Saudi Arabia a enkawl laia Asian Cup lo chawi tawhtu coach hian match hmasa bera Kerala Blasters an hneh ṭumin Indian player tam zawk an la chhawr tur thu sawi mah se match hmasa zawk ang thoin Mizo rawlthar rual Lallianzuala Chhangte, Jerry Mawihmingthanga leh Lalrempuia Fanai te chuan bench lamah hun an hmang tluan.

Zanin hian Chennaiyin FC chuan Delhi Dynamos an mikhual dawn. Chennai club-ah hian Jeje Lalpekhlua, Daniel Lalhlimpuia leh Jerry Lalrinzuala te awmin Delhi-ah hian I League khelh zawh taka Aizawl FC defender pahnih Lalchhawnkima leh Lalruatthara te an awm thung.

Chennaiyin coach Marco Materazzi leh Delhi coach Gianluca Zambrotta te tan zanin hi inkhel danglam bik a ni dawn. Italy defender pawimawh ni ṭhin pahnih hi Inter Milan leh Juventus tan an khelh laiin an lo inhmelma tawh ṭhin a, kum 2006 World Cup-a Italy an champion ṭum khan player pawimawh pawl ni phak ve ve an ni bawk.