Record ropui neitu Italy hmaah Spain
Italy-in kum sawm chhung zet FIFA World Cup leh UEFA Euro qualifying-ah match 51 khel tawhin tlawm hmel an la hmu lo a, zanin dar 12:15-ah World Cup qualifier khel turin Spain an mikhual dawn - Julen Lopetegui-a naute hi Italy record ropui thaichhe turin an ṭha tawk.
Euro 2016 khelh zawh takah khan Italy hian Spain hi 2-0 a hnehin last 16 aṭangin an lo pet chhuak tawh a, champion beisei Spain-in mualpho takin an puanthuah an tel. Zanin an inkhelh hunah Juventus khelmuala phuba lak hi an chak zek zek ang.
Inlan tur
Spain coach Julen Lopete-gui-a'n a vawi khat nan Man-chester United midfielder Ander Herrera chu ram tana inlan turin a ko a, kum 27-a upa midfielder hi Italy hmachhawn tur meuh erawh chuan a ringtawk kher lo mai thei. Euro 2016-a koh loh zingah Isco chuan an ram team-ah hmun a chang ve leh tawh bawk a, goalkeeper Iker Casillas, Cesc Fabregas leh Juan Mata te chu koh loh langsar zingah an tel.
Mario Balotelli-a'n tun season inelna hrang hrangah match nga khelin goal ruk khung mah se Italy coach Giampiero Ventura-a'n harhtharna chang mek striker hi koh loh zawk a thlang a, Liverpool striker hlui chuan Italy-a hmun chang leh tur chuan goal a khung chhunzawm zel phawt a ṭul thu a sawi. Southampton striker hlui Graziano Pelle erawh sum umin Chinese Super League lamah kal mah se Italy squad-ah koh chhunzawm a ni zel.
Bonucci a phur
Euro 2016-a Italy-in Spain an hneh ṭumin Leonardo Bonuc-ci a tel a, Juventus defender chuan, "Paris ka ngaihtuah apiang hian ka rilru hi a la hlim veng veng ṭhin. Khawvela team ṭha ber pawl kan hneh avang khan a nuam em em a, hnehna kan lo chan tawhna kha phurna min siamsaktuah hman kan tum ang. Mahse, Spain hi Euro nena khaikhin kha chuan team danglam an ni tawh a, coach thar enkawlna hnuaiah phur takin an khel a ni," tiin a sawi a, team dang daih an hmachhawn tur thu a sawi.
Italy coach Ventura chuan, "Spain hian World Cup qualifying match-a hnehna an chan loh hnuhnung ber chu kum 23 liam taah khan a ni tawh a, hmachhawn an hautak dawn. Euro 2016-a an khelh danah khan innghat thei kan ni tawh lo a, nasa taka inthlak danglamin an insiamṭha tawh a ni. Kan group-a team ṭha ber kan hmachhawn dawn a, a awlsam lo ang," tiin an khingpui tur team a fak.
Inngam tawk
Italy leh Spain hi tun hmain vawi 35 zet an lo inhmachhawn tawh a, an inngam tawk hle. Italy-in vawi 11 hnehna changin vawi 12 an inhnehtawk a, Spain hian vawi 12 hnehna an chang thung.
Team pahnih inhmachhawn-na match 35-ah hian goal 78 zet a lut tawh a, Italy-in an khung hnem zawk. Azzurri hian Spain goal-ah vawi 42 zet khungin Spain hian a chhanletna goal 36 an nei.
Italy-in an khelmuala Spain an mikhualin ṭhat chhuah an tum ngai lo. Vawi 20 zet Spain an mikhualna inkhelah vawi 10 a chak zawkah ṭangin vawi sarih an inhnehtawk a, vawi thum an tlawm. Spain goal-ah vawi 33 zet lo pet lutin vawi 17 an chhuah thung.
Juventus Stadium-a khel tur an nih avangin Italy hi chak zawk tura beisei an ni a, hetihrual hian Spain hi thai bo ngawt theih erawh an ni lo. Italy tlarhnung Gianluigi Buffon, Andrea Barzagli leh Leonardo Bonucci te hi Juventus player vek niin an khelmual hriatchian saa inkhel tur an ni dawn a, Spain tlarhma tan sut tlang an harsa dawn.