Sindhu a kal ngaiin a kal

Indian shuttler zinga Olympic silver medal dawng hmasa ber Pusarla Venkata Sindhu chuan lawmpuina leh duhsakna kawng hrang hrangin dawng reng mah se badminton khel zel turin a thawhrim chhunzawm thu a sawi.

Rio Olympic badminton hmeichhe singles final-ah Sindhu hian world number 1 Carolina Marin a hneh lo a, Brazil aṭanga a rawn haw hnuah sum pawh vaibelchhe tam tak dawngin hmun hrang hrangah lawmpuina hun hman deuh reng a ni bawk.

Kum 21-a upa Sindhu chuan, "Lawmpuina leh duhsakna ka dawng hnem a, a hunlai a nih avang-in ka tan chuan dawn sen loh khawpa tam a ni. Mahse, a pawi-mawh ber erawh court chhunga ṭha taka ka khelh chhunzawm a ni a, chumi tur chuan nitin rim takin training ka nei chhunzawm reng a ni," tiin coach Pullela Gopichand-a Academy-ah a inzir zel thu a sawi.

Hyderabad nula hi thla hmasa khan sports management company Baseline chuan kum thum chhung atan inremna an lo siam pui tawh. An inremna hi vaibelchhe 50 thleng tling chho thei a nih avangin India rama infiammi leh company inremna bikah cricket player ni loah chuan sum hlawm tamna ber a ni hial.