Hernandez-a'n UCL khelh zawm a beisei lo
Bayern Munich defender Lucas Hernandez chuan Champions League quarterfinal chu khelh chhunzawm theih ngei se a duh a, chutihrualin Covid-19 vangin an khelh zawm theih a beisei loh thu a sawi bawk.
Europe football thuneitu sang UEFA chuan tiam chin awm loin Champions League leh Europa League te chu a ti tawp lailawk a, hri leng hian reh lam a la pan hleih theih loh avangin khelh chhunzawm leh theih hun tur hriat a la ni lo.
Kar hmasa khan UEFA president Aleksander Ceferin chuan July-August thla velah chuan entu awm loa inelna neih a ngai mai thei niin a sawi a, an chhunzawm thei ta lo a nih pawhin a pawm tur thu a lo sawi tawh bawk a ni.
France international Hernandez chuan, "Mahni ram league ṭheuh khelh chhunzawm pawh thil awlsam a ni dawn lo. Champions League phei chu hri leng tamna hmuna zin a ngai nasa zual a, hei hian harsatna a siam belh dawn.
"Duhthusamah chuan UCL hi khelh zawh ngei a chakawm, chutihrualin hrilselna hi kan dah pawimawh hmasak a ngai," a ti. Bundesliga lamah chuan training an chhunzawm leh tawh, mahse tun hma lama a huhoa an training ang kha chu an la nei thei rih lo.
Hernandez chuan, "Club-in ruahmanna ṭha tak a siam a, chumi chu player lamin kan zawm ngei a ngai. Hlawm hrang hrangah min ṭhen sawm a, inhnaihchilh lo thei ang berin inbuatsaihna kan nei," a ti.
German champion Bayern hian Bundesliga season kal laiah hma an hruai mek, an elpui Borussia Dortmund aiin point liin an sang mek.