Murray-a'n bul ṭan fuh

Andy Murray chuan a vawi khat nana China Open nomawi chawi a tumna kawngah bul a ṭan fuh hle. World number 2 hian Thawhlehni tlai khan world number 94 Andreas Seppi chu 6-2, 7-5 in a hneh.

Grand Slam vawi thum cham-pion tawh Murray hian set hmasa zawkah Italian tlangval Seppi service hi ṭum hnih a chhuh sak a, set hnuhnung zawkah 2-0 in hnufual mah se darkar khat leh minute 26 chhungin a chak zui ta tho.

Kum 29-a upa Murray hian Beijing-a inelna an neih ṭan hma hian world number 1 Novak Djokovic nen ATP ranking-a an inkar tih zim nan champion ngei a tum thu a lo sawi tawh a, Serbian thiampuipa Djokovic hi hliam vangin a chawl mek.

China-ah hian Britain star tan awlsam taka nomawi chawi ngawt theih a ni bik dawn lo a, player langsar dang Rafael Nadal leh Milos Raonic te chuan first round hi an lo paltlang tawh bawk a ni.