Zokhawpuiah MPL khel dawn ta I League club hmaah West Warrior
Champhai mipuiin Mizoram Premier League club-te chungah ṭhat an chhuah a, Mizoram club ṭhaten football hmuhnawm hmangin tualchhung mipui tih lawm an tum ang.
Vawiin chhun dar 12 :00 hian Chhangphut Field-ah Mizoram club zinga
I League khel thei awm chhun Aizawl FC leh MPL5-a match li chhung hneh loh tawng tawh lo Chanmari West an inhmachhawn dawn.
Lei leh Van
Aizawl FC-in kumin I Day Foot-ball group stage-ah Chanmari West FC chu 2-1 in an hneh a,
I League club hian tun season-a an nomawi hmasa ber an chawi zui bawk. West Warrior erawh AFC an hneh loh avangin group stage an pel lo a, MFA Super Cup-ah first division club Chawnpui FC an hneh lo bawk.
Chanmari West harsatna hi MPL ṭantirhah pawh a la kiang mai lo a, match hmasa pahnihah kai thar Chhinga Veng FC leh Bethlehem Vengthlang FC an hneh lo. Hemi hnu hian HC Zarzoliana kaihhruai team hian harhtharna an chang a, match liah point 10 an hlawh chhuak.
West Warrior coach Zara chuan, "I Day Football-a AFC nena kan intawn ṭum leh tun hun hi chu lei leh van ang mai a ni. Tunah chuan kan player-ten hma an sawn bakah an dam kim tawh," tiin an ṭhat vanglai taka Champhaia an zin thu a sawi.
Double 'D' Vs Double 'B'
Chanmari West FC-in Laldam-puia (5 goals) leh R. Laldanmawia (3) an kawl a, winger pahnih goal khung belhkhawm hi goal riat a tling tawh. West Warrior captain Dampuia hian
I Day Football-a AFC an hmachhawn ṭum pawhin goal a khung nghe nghe. Double D hming lem an vuah Dampuia leh Danmawia te hi Aizawl FC coach K. Malsawmkima pawhin an ṭha tih a pha lo.
AFC boss Mala chuan, "Dam-puia hi chu tun hma pawha ṭha ka tih sa a ni a, I League-ah erawh foreign coach hnuaiah rin a hlawh loh avangin inrintawkna a hloh a, a khelh chhunah pawh a cheṭha lo. Kei chuan tuna a khelṭha pawh hi mak ka ti lo a, goal khung thei player a nih avangin ven uluk a ṭul ang. Danmawia pawh hi ka player duh zawng a ni a, remchang chu awm se vawi khat na na chu enkawl ve ka châk khawp mai," tiin a khingpui player-te a fak. Dampuia hian season liam ta khan Aizawl FC tan a khel a, player pawimawh a ni pha lo!
Aizawl FC-in Bright Middleton Mends leh Benjamin Eniwo Onome te an nei a, Ghanaian forward leh Nigerian midfielder te hian Chhangphut field-ah bul an ṭan dawn tih Mala'n Vanglaini palai a hrilh. MPL5-ah Bright hian goal hnih chauh la khung mah se
I Day Football leh MFA Super Cup champion-na kawngah match 10 khelin goal nga a khung. Durand Cup-ah Bright-a'n theihna sang tak a nei tih pholangin match ngaah goal ruk tehmeuh a khung bawk.
Ghanaian forward Bright hian amah thlawp turin Albert Zohmingmawia leh Brandon VL Remdika a nei a, winger ṭha pahnih bakah Aizawl FC-in Nigerian midfielder Benjamin an nei leh bawk. Double B ten a vawi khat nan Chhangphut Field-ah inkhel bul an ṭan dawn a, en châkawm tak a ni.
West Warrior coach Zara chuan, "Mizoram-ah foreign player kan hmu nual tawh a, amaherawhchu han ngaihsan tur em em hi ka la hmu lo. Chuvangin AFC hian foreigner pahnih nei mah se kan hlauh phah lo," tiin an inrintawk thu a sawi.
Chullova leh midang
Aizawl FC defender Lalram-chullova hi MPL awm hnua player hmasawn châk ber a ni a, FC Kulikawn-a bul ṭan (MPL-ah) player naran ni ṭhin Armed Veng tlangval hi MPL5-ah meuh chuan player ṭha bik a ni tawh. MPL awm hmaa lar tawh Rohmingthanga a la thiam reng a, Lengpui tlangval hi MPL5 midfielder hmuhnawm zingah chiar hmaih theih a ni lo.
Chanmari West lamin H. Lal-lianzama an nei a, Leitlangpui tlang-val hi Lalmuanzuala leh Lalbiak-hlua ten an thlawp ṭha a, a hlawkna hmutu chu Double D te an ni. Hei chauh hi a ni lo, Chanmari West hian match hnuhnung paliah goal khat chiah an chhuah a, R. Lalawmpuia leh Toky Zomuanpuia te inkawp hmaa K. Lalnunzama awm chu AFC tlarhma tan pawh sut tlang a harsa ang.
Engtin zel?
Chanmari West FC-in Thawhṭanni khan Zokhawpui (Champhai) an thleng tawh a, Aizawl FC erawh hemi ni hian Lammualah Ramhlun North nen an inkhel thung. Thawhlehni zanah AFC-in Champhai an thleng ve chauh a, kawng a chhiat bawk avangin Aizawl leh Zawlkhawpui inkar hi darkar 12 kal a tling - chauhna tham a ni.
Aizawl FC coach K. Mal-sawm--kima chuan, "Kan chau ve khawp mai, mah se hei zan hnih kan riah chuan kan zia khawp ang. Champhai boruak a nuam a, field a ṭha bawk a, football hmuhnawm tak kan khelh theih kan beisei," tiin Vanglaini palai a hrilh.
Chanmari West coach HC Zarzo-liana chuan, "Pathumnaah kan awm mek a, kan vanneih chuan pahnihnaa awm chho thei kan ni. Hnung tawlh kan duh loh avangin chak ngei kan tum," tiin a sawi a, Champhai boruak nuam a tih thu a sawi tel bawk.
ROUND 7
Vawiin inkhel tur
12:00 PM Aizawl FC Vs Chanmari West
02:30 PM Chanmari FC Vs Bethlehem VT
October 7, Zirtawpni
12:00 PM Ramhlun North Vs Chhinga Veng
02:30 PM Dinthar FC Vs Zo United
Team Dinhmun
# Team Pld W D L GF GA GD Pts
1 Bethlehem VT 6 5 1 0 7 1 6 16
2 Chanmari FC 6 3 2 1 10 5 5 11
3 Chanmari West 6 3 1 2 9 5 4 10
4 Aizawl FC 6 3 1 2 7 4 3 10
5 Zo United 6 1 3 2 1 4 -3 6
6 Chhinga Veng 6 1 2 3 7 10 -3 5
7 Ramhlun North 6 1 1 4 3 8 -5 4
8 Dinthar FC 6 0 3 3 4 11 -7 3