Bethlehem VT Chanmari FC A sang ber leh a dawttu

Mizoram Premier League Season 5-ah hneh loh la tawng lo club pakhat chiah an awm - chu club chu Bethlehem Vengthlang FC an ni. Point 16 hmua hmahruaitu ni mek BVT hian vawiin tlai dar 2:30 hian Chhangphut Field-ah MPL2 champion Chanmari FC an hmachhawn dawn.

Mumang ram

Chanmari FC-in club lian zia chhuahin Bethlehem Vengthlang chu an duhlai coach Lalsangzuala Hmar an chhuhsak a, BVT hian season liam taa an player ṭha an hum thei lo bawk. Captain Lalrammawia, Lalruatfela Zote, MS Dawngzela, Ramfangzauva leh Lalmuanawma ten an pu Sanga hnung an zui a, Chhinga Veng FC-in MS Dawngliana leh R.Laldinliana te chhuhsakin MPL4 best midfielder K. Lalṭhathanga'n I League club DSK Shivajians a zawm bawk.

BVT-in MPL-a tawnhriat nei lo Lalbiaksanga Colney chu team kaihruai turin an lalut a, veng inelnaa Armed Veng tihmingṭhatu BS-a'n bul ṭan fuh lo mah se MPL5-ah erawh tualchhung football ngainatute an barakhaih chiang hle. BVT hian match ruk khelh tawhah Aizawl FC tiamin Chanmari West FC, Zo United, Chhinga Veng leh Dinthar FC te an hneh vek a, Ramhlun North lakah chiah point khat an hlawh chhuak.

Season tawp lama tlak hlauh­awm dinhmuna ding tura ngaih BVT hi tunah chuan an relegate dawn lo tih a chiang tawh a, semifinal an luh ngei a rinawm tawh bawk. BS-a Colney hnuaia BVT thlen chin hi a ropui a, Armed Veng pachal leh a player-ten chawimawi an phu bakah BVT mipui ten fak an phu.

BVT khulhpui

Bethlehem VT tan match thum a zawna goal khung tawh Lalrammuanpuia (Apuia) a pawimawh a, midfielder Lal­mawizuala (Ashtea) chu langsar si loin player ṭangkai a ni. Player langsar ber captain Laldingngheta'n season bul ṭan ṭha mah se Dinthar FC an khelh ṭuma a inliam avangin match hnuhnung pahniha point ruk an hmuhnaah tha a tawh lo.

BVT tan defence laia ding H. Lal­hlim­puia leh PC Laldinpuia te inkawp hi MPL5 bika tlarhnung inkawp fuh ber an ni a, an hnunga ding Malsawmdawngzela aia goalkeeper ṭha tun season-ah an awm lo. Left back-a awm Hming­­thanmawia'n a hna a tlin a, rawlthar duhawm K. Lalmalsawma (Buangpuia) lah beisei phak bakin a khelṭha bawk. Amaherawhchu Buangpuia hi inhliam vangin a inlan tawh lo a, Chanmari hmachhawn tur chuan Armed Veng tlangval Lalnghinglova (MP-a) a rawn pen chhuak ang.

BVT coach Lalbiaksanga Colney chuan, "Phase 1 khar nan match khat chauh kan khel tawh dawn a, kan theihna zawng zawngin chak tumin kan khel dawn. Inhliam vangin chhuanlam neih kan tum lo a, Chhangphut Field-ah hian point hlawhchhuah ngei kan tum a ni," tiin Vanglaini palai a hrilh.

Ṭantu an neih ṭhat tur thu sawi chhunzawmin BS-a chuan, "Bethle­hem Vengthlang lama Aizawl Thunder ten min rawn ṭawiawm dawn a, anni hian Khawzawl Thunder an sawm chho dawn bawk. Champhai leh Khawzawl Stu­dents Union ten min rawn
ṭawiawm tur thu min rawn hrilh bawk," a ti. Lammuala ṭantu nei ṭha ṭhin BVT-in Champhaiah ṭantu an nei ṭha dawn a, kum 2014-a a goal khung lawmna lama nunna chan ta Peter Biaksangzuala kha BVT midfielder a ni a, Khawzawl mipuiten an khaw tlangval khelh ṭhinna club an theihnghilh lo.

50-50

Vanglaini palaiin BVT neih ṭhat zawng zawng inchhuhsak tawh avangin chak tur chiangsa in ni em tia a zawhna chu Chanmari manager Mawitea chuan, "Star player rual pawh awm khawm mah ila kan chak chiang a tih theih loh, 50-50 a ni," tiin a ṭawng pawr duh lo.

Chanmari FC hian midfielder R. Malsawmtluanga chhawr thei lo mah se forward Lalruatfela Zote a dam tawh avangin BVT hmachhawn hi an phur sawt ang. Republic Vengthlang tlangval Fela tel loin Lalsangzuala Hmar hote hian an match hnuhnung berah Chanmari West FC an hneh lo a, hemi hma hian Zo United leh Dinthar FC an draw bawk.

Chanmari manager Mawitea chuan sawi chhunzawmin, "Cham­phai DFA District hruaitute an phur a, an entawn tlak hle. Champhai College-ah kan thleng a, principal leh college staff ten tui hniang hnar tak leh thlenna nuam tak min pek avangin an chungah kan lawm hle a ni," tiin lawm thu a sawi.

Squad nei chhah ṭha zawk Chan­mari FC hian BVT aiin ni khatin Champhai an thleng hmasa zawk a, vawiin tlai inkhel turah hian MPL2 champion Chanmari hi chak tura rinkai zawk an ni.