Federer ngaisangtu Berrettini

Tennis mipa world number 8 Matteo Berrettini chuan Roger Federer a ngaihsan thu a sawi a, tun dinhmun a thlen theih nana amah chona petu chu Swiss star hi a nih thu a sawi lang tel.

Season hmasa khan Berrettini hi a tir lamah chuan ranking sang zual 50 zingah a tel phak lo, mahse season a tawp meuh chuan a thiam zual pariat inelna ATP Finals khel zingah a khel phak.

Budapest leh Stuttgart Open-ah te a champion bakah Munich Open final a lut a, inelna lian US Open semifinal a khel phak bawk - atan chuan season duhawm tak a ni chiang hle.

Halle Open an khelh ṭumin Berrettini leh Federer te an inhmachhawn a, Wimbledon fourth round-ah intawng lehin Federer-a'n 6-1, 6-2, 6-2 in hnehna a chang. Roger hian a khingpui chu player ṭha leh hmabak nei êng a nih thu a hrilh.

Kum 23 mi Berrettini chuan, "Wimbledon khelh hma khan ka khel ṭha tluang a, Stuttgart-ah phei chuan ka champion hial. Halle-ah Federer nen kan intawng a, fuihna thu ṭha tak min hrilh.

"Wimbledon draw a chhuah khan inhmachhawn theiah kan awm leh, chumi pawh chuan inbe tam lo mah ila grass court season ka hman ṭhat avanga min lawmpui thu a sawi leh a, a sang thei ang ber thlen tum turin min fuih bawk," a ti. 

Italian player chuan Roger nena an chanchin sawi zawm zelin, "London khawpuiah ATP Finals khel tuin kan inhmu leh a, court pawn lamah mi fel leh nelawm a nihzia ka hria, midang tan entawn tlakin a awm a, player naupang zawk fuih phurtu a ni," a ti.

Grand Slam vawi 20 champion tawh Federer hi a kum a tam tawh a, a kum rualpui player dangte chu an chawl tawh. Swiss star erawh a dam a nih phawt chuan player ṭha leh hlauhawm berte zinga mi a la ni thei reng.