Arsenal leh beiseina

Champions League la champion ngai lo an ni a, tun hmain final chu an khel tawh. European football inelna sang berah hian 2008-09 season hnuah Arsenal hian semifinal an la thleng leh ngai lo, tun ṭumah pawh khan Real Madrid lakah rinkai lo zawk an ni.

Mahse, Gunners hian a tir aṭangin an khel ṭha zawk a, a tawp thlengin team chungnung zawk an ni. UCL lama tawnhriat nei tlem leh patuai zawk ni mah se William Saliba leh Jakub Kiwior te inkawp an nghet; Vini leh Mbappe dang theitu an ni tlat.

Arsenal manager Mikel Arteta chuan, "Mi zawng zawng khan kan tih tur chin a ṭha thei an berin kan hlen chhuak vek niah ka ngai a, chumi piah lamah chuan Rice khan thil mak a rawn thlen tir bawk, chu chuan danglamna a siam ta a ni," tiin a sawi.

Mikhual an thlen hmain Arteta hian fans lam chu boruak siam turin a ngen a, inkhelh ṭan hma aṭanga a tawp thlengin Emirates Stadium chhungah thawm a ring hem hem hle. Arteta chuan, "Khatiang tak kha tunhma in ka la hmu ngai lo," tiin a sawi hial.

Goal khungtu an mamawh lai takin Declan Rice a inlar a, English midfielder tan zan chhinchhiah tlak bik a ni reng tawh ang. Freekick a chhuih lut a ni satliah lo a, team ṭha Real Madrid lakah goal mawi leh pawimawh bik a khung.

Kum 26 mi Rice chuan, "A hmasa zawk ka khung hnu kha chuan inrintawkna ka nei sang hle a, freekick vawi hnihna ka pet dawn kha chu goal kila khung theih kha ka inring tlat tawh a ni," tiin a sawi a, second leg an la khelh dawn avangin hahchawl thei an la ni lo tih a sawi bawk.