Real an beidawng lo

Tun hnaiah Real Madrid an khel ṭha tawk lo, an match hnuhnung pangaah vawi hnih chauh chak chungin Arsenal an tlawh. Inkhelh hmain Thibaut Courtois chuan Arsenal lam set-piece a hlauhawm thu a sawi lawk a, a hlauh ang ngeiin an tuar zui ta bawk.

European football inelna sangah vawi 15 lai champion tawhin sulhnu nei ṭha mah se an tlarhnung a phui lo a, inelna hrang hranga an match hnuhnung 11 aṭangin goal chhuah lohna vawi hnih chiah an nei, insiamṭhat an mamawh hle.

Real Madrid manager Carlo Ancelotti chuan, "Goal a luh hma kha chuan kan intluk tawk a, kan khel chhe lo bawk. Mahse, goal khat a luh hnuah kan tlusawp, hetiang thil hi tun season chu kan chungah a thleng fo," a ti a, an khelh danah a lungawi lo.

Spanish club tana buaina belhchhah turin, hun tawp dawnah Eduardo Camavinga chu hnawhchhuah a ni a, anmahni muala mikhual an thlen hunah a inlan thei lo ang - kum 39 mi Luka Modrid leh a ṭhiante tan mawhphurhna a sang leh sawt dawn a ni.

Dinhmun ṭha lo zawk ni mah se Real Madrid erawh an la beidawng lo. Jude Bellingham chuan, "Second leg khelh tur kan la nei, thil mak thlen tir erawh a ngai tawh dawn. Mahse, thil mak thlen tir turin kan mualah hun kan la nei," a ti.

Tun hma pawhin Real Madrid hi dinhmun hnuaihnung zawka an din hnuah an lo tho chhuak fo tawh a, goal thum sut hi Los Blancos tan thil theih a ni. Chuthrualin, an tlarhnung a phui loh em avangin goal tam zawk chhuah thei an la ni ve bawk.