Bayern khelmualah Inter an chak

Allianz Arena-ah Bayern Munich an tlawm a, a hnehtu chu Inter Milan an ni - Thawhlehni zan khan Champions League quarterfinal first leg-ah Bayern hian Inter an mikhual a, 2-1 in an tlawm.

Italian club tan Lautaro Martinez chuan goal hmahruai a khung a, hun tawp nan minute nga chiah a awm tawh tihah substitute Thomas Muller chuan si phurh a sut a, team pahnih hi 1-1 in an ṭin mai dawn niin a lang hman.

Mahse, Bayern ṭantute hlim chhung a rei lo. Goal an chhuah aṭanga minute thum hnu lawkah Davide Frattesi chuan Inter tan a khung ve leh a, German club tan goal khung turin hun a awm tawh lo a, 2-1 in an tlawm.

April 16, Nilaini zanah second leg khel turin Inter-in Bayern an mikhual ve tawh dawn a, San Siro-ah si phur saa an lenluh dawn avangin Vincent Kompany naute tan a awlsam tawh lo ang.

Bayern an hliam

Bundesliga hmahruaitu Bayern-in player inhliam an ngah a, an ṭhat dan berin Inter an mikhual thei lo - Alphonso Davies, Dayot Upamecano, Aleksandar Pavlović, Manuel Neuer, Hiroki Itō leh Kingsley Coman te an inhliam a, kartawp khan Jamal Musiala a inhliam ve leh bawk!

Bayern player inhliam ho thlir ila, dam ngat se, a tam zawk chu inkhel bul ṭan tur an ni. Heti chung hian inkhel ṭantir lamah chuan German club hi an ṭang thei viau a, goal pawh an khung hmasa mai dawn niin a lang hman.

Mahse, striker chhuanvawr Harry Kane-a ke hmui zan a ni lo a, chance vawi tam a hlah - goal luh hmaa post a pet perte chu uiawm a tling a, Michael Olise pawh a vanneih zan a ni bik lo.

Minute 38-naah Inter-in Bayern an hrem ta nge nge a, team movement mawi tak kan hmuh hnuah captain Martinez chuan a hmawr bawkin, Italian club tan goal hmahruai a khung.

A hmuhnawm

Second half-ah Bayern-in si phurh sut ngei tumin Inter an nawr a, vanneih an harsat tlat! Raphael Guerreiro leh Kane ten an chance neih an hlah a, Bayern tan khua a var thei lo.

Minute 85-naah erawh Bayern an vannei ta nge nge. Season tawp ruala German club chhuahsan tur Thomas Müller a inlar a, kum 35 mi attacking midfielder hian Champions League-a a goal 57-na hmangin si phurh a sut.

Allianz Arena thawm a ring takzet a, an hlim chhung erawh a rei lo! Minute thum hnu lawkah Carlos Augusto-a siamsak chu bench aṭanga lut ve tho Davide Frattesi chuan goal-ah a chantir a, 2-1 a ni leh der!

Bayern tan insiamrema tho turin hun a awm tawh lo a, an mikhual lakah an tlawm. Champions League-a anmahni muala match 22 zet a zawna an tlawm loh record chu thaichhiatin a awm a, Italy-a inkhelh hun an nghakhlel khawp ang.