Super Cup: East Bengal-in Blasters tawng dawn

India rama club football inelna ngaihhlut hlawh, Indian Super Cup chu April 20, Pathianni aṭangin khelh ṭan a ni dawn a, match hmasa berah Kerala Blasters leh East Bengal an inkhelh nghal dawn avangin boruak a 'hot' ang.

East Bengal hi champion lai an ni a, an nomawi humhim an duh dawn. Kolkata club hian player nei ṭha mah se, club inrelbawlna a fuh tawk lo a, an elpui Mohun Bagan-in ISL league nomawi chawi a, ISL Cup final an luh bawk laiin, league table-ah pakuana niin season an khar.

Kolkata club hian ISL lama an result chhia thawi dam nan Super Cup nomawi humhim an duh dawn a, chutihrual chuan an hmaa ding tur Kerala Blasters hi ISL khelh zawh taka an chung chiaha awm an ni - a awlsam lo ang.

Super Cup hi hmun khatah khelh tur niin, Bhubaneswar, Odisha chuan inelna hi a thleng dawn a, match zawng zawng hi Kalinga Stadium-ah khelh vek tur a ni dawn bawk.

ISL club 13-te chuan inelna hi an hmachhawn vek dawn a, I League aṭangin club pathum, Churchill Brothers, Inter Kashi leh Gokulam Kerala te an inlan dawn bawk a, club 16-in inelna an hmachhawn dawn tihna ni.

Super Cup hi season dang ang thoin knockout format hmanga khelh tur a ni a, vawi khat chak lohah a tlak nghal theih dawn tihna a ni a, team tin an fimkhur khawp ang.

ISL club zingah Odisha an vannei ber tia chhal ngam an ni a, an khelmualah inelna an thlen dawn avangin season hmasa finalist hian tun season-ah chuan nomawi chawi an beisei dawn.

Round of 16 hi April 20-24 inkarah khelh zawh tur a ni a, April 26 & 27-ah quarterfinal khelh tur niin, April 30-ah semifinal khelh a ni ang - final hma zawng hian extra time khelh a ni dawn lo.

Minute 90 chhunga chak zawk an awm lo a nih chuan penalty hmanga chak zawk chinfel nghal tur a ni dawn a, May 3-ah final khelh a ni ang - final-ah erawh minute 90 chhunga chak zawk an awm lo a nih chuan extra time khelh tur a ni thung.

Super Cup 2025-a champion team chuan season tharah AFC Champions League Two preliminary round an khel dawn a, he inelna hi Asian football-ah chuan club inelna sang ber dawttu a ni - Europe-ah chuan Europa League tlukpui tihna a ni a, champion lawmman hi a hlu hle.

Kum 2018 khan Super Cup hi khelh ṭan a ni a, tun hi vawi nga neih a nihna tur a ni. ISL Cup final khel tur Bengaluru chu he inelnaa champion hmasa ber an ni a, a kum hnihnaah FC Goa an champion.

Covid-19 hri leng avangin 2020-2022 inkar khan Super Cup khelh a ni lo a, 2023-ah khelh ṭan leh niin Odisha an champion. Nikumah pawh Odisha hian final lut lehin, an nomawi humhimna chance nei mah se, East Bengal chu 3-2 in an ngam lo.

Season hmasa hian Odisha forward Isak Vanlalruatfela chu Best Player atan thlan a ni a, khatihlaia Odisha goalkeeper Lalthuammawia Ralte chu Best Keeper atan thlan a ni bawk.