Ban theih dinhmuna ding Postecoglou

Tottenham-in season an hmang ṭha lo a, Ange Postecoglou tan London club enkawl chhunzawm turin Europa League nomawi chawi a pawimawh ang. Spurs hian zanin dar 12:30 hian Eintracht Frankfurt an mikhual dawn a, inkhel hi Postecoglou hmalam hun hriatna tur a ni.

London club hian Postecoglou hi an ban hnai nia sawi a awm a, Europa League aṭanga an tla a nih chuan ban pawh ni se thil mak a ni tawh lo ang. Spurs hi Premier League table-ah 14-naah an awm mek a, tun season-ah league match 16 ngawtah an chak tawh lo.

Chutihrualin Postecoglou hian a team enkawl tawhah season hnihnaah nomawi a chawi ziah thu a sawi a, Europa League hian a record duhawm tak hi a la tidik chhunzawm thei dawn. Spurs hian 2022-23 season UCL group stage-ah Frankfurt nen hian group khatah an awm a, Germany-ah 0-0 a inhnehtawkin London-ah 3-2 in an chak.

Man City-in Frankfurt forward hriam ber Omar Marmoush an la chhuak tawh a, hei ringawt pawh hi Spurs tan chanchin lawmawm a tling. German club hian inelna hrng hranga goal 19 khung tawhtu Hugo Ekitike an kawl a, World Cup final-a chakna goal khungtu Mario Gotze pawh an nei.

Dino Toppmöller-a kaihhruai Eintracht Frankfurt hian kartawp khan Werder Bremen 2-0 in hneh lo. Mahse match hnuhnung ber aṭang ringawt teh chi a ni lo - Bundesliga-ah pathumna an ni a, Spurs tan hna a hautak ang.