UCL-ah Premier League club panga an tel dawn

Arsenal-in Champions League first leg-a Real Madrid 3-0 a an sawp zawh chiah khan English club tan chanchin lawmawm a awm. Season tharah Premier League club pangain Champions League an khel dawn tih a chiang.

UCL kalphung tharah team 36 an inel a, kalphung hmasa aiin team pali ngawtin an tam belh. Team pahnih hi season kal meka UEFA coefficient ranking-a ram che ṭha hmanga thlan a ni.

Inelna hmachhawntute?

UEFA hnuaiah hian ram 55 an awm a, tun season (2024-25) ah ram 51 aṭangin team 81-in inelna hi an hmachhawn.

UEFA association coefficients hmangin ram hrang hrang ranking pek an ni a, association pakhatna aṭanga panganaten team li (4) ṭheuh an thawh thei a, paruknain team thum an thawh a, pasarihna aṭanga 15 ten team hnih ṭheuh an thawh.

Association ranking-a 16-55 ten team khat ṭheuh an thawh bawk. Liechtenstein leh Russia club-te erawh an tel ve lo thung. Liechtenstein hian Swiss League an zawm a, Russia erawh Ukraine an do avangin hrem an ni.

Team 36 telna inelna tak tak hmachhawn hmain qualifying round pali a awm a; first, second, third leh playoff hmanga thliar hran a ni. Team 36 zinga team 29 ten qualifying round an khel lo. Chung zingah chuan association chet ṭhat vanga vannei team hnihte pawh an tel.

Season liam taa vannei Dortmund leh Bologna te pawhin qualifying round emaw playoff emaw an khel lo tihna a ni.

Quota 2 chu

Europe inelna pathum UCL, UEFA Europa League (UEL) leh UEFA Conference League (UCoL) a club-te chet ṭhat dan a zirin quota pahnih hi siam a ni a, Premier League-in quota pakhat an hnawh khat dawn. La Liga hi quota pakhat zawk chang turin an dinhmun a ṭha.

Inelna pathum hian coefficient-ah nghawng a nei vek a, team pakhat an chakin coefficient point hnih an hmu a, an inhnehtawk chuan point khat an hmu a, an chak loh chuan point an hmu lo thung.

Extra time khelh a nih chuan minute 120 hnua result chu en a ni a, penalty shootout erawh an chhut tel lo thung. Club hrang hrang point hmuh chu belh khawm a ni a, club zatin an sem leh thung. Entirnan club point hmuh belhkhawm chu 60 ni ta se, club pasarih an awm chuan an coefficient point hmuh chu 8.571 tihna a ni.

Tun season-ah Europe inelnaah England club-te an che ṭha a, 24.535 coefficient point an hmuh tawh avangin an hnuaia awmten an umpha thei tawh lo. England hi Spain (21.678) leh Italy (20.187) ten an dawt a, hmun ruak pakhat dang hnawh khat turin La Liga club dinhmun a ṭha hle.

A la harsa tho

Premier League aṭangin club pangain Champions League khel dawn mah se Europe inelna sang ber khel tur zawn a harsa chhunzawm dawn. Tun dinhmunah Liverpool leh Arsenal te chuan season tharah Champions League an khel dawn tih a chiang a, hmun ruak dang pathum a la chiang lo.

Nottingham Forest, Chelsea, Newcastle United, Manchester City, Aston Villa, Fulham leh Brighton tan UCL khelh theihna kawng a la inhawng. Premier League champion lai City meuh pawh paruknaah an awm a, quota panga an nei tawh chungin UCL khelh phak a la harsa dawn tho.

UCL-ah Premier League club pasarih an khelh theih dan a la awm bawk. A sang panga zingah Aston Villa an lan phak loh a, UCL-a an champion chuan season tharah Europe inelna sang an khel ang. Europa League lamah Manchester United emaw Tottenham emaw an champion chuan quota pasarih a ni chiah ang.