Chennai-in Arya an ngam lo

IPL-ah Punjab Kings-in Priyansh Arya century hmangin Chennai Super Kings 18 runs-in an hneh. MS Dhoni telna Chennai hian match nga an khelh tawh aṭangin vawi khat chiah hnehna an la chang.

Maharaja Yadavindra Singh International Cricket Stadium-a inkhelah Punjab-in bat hmasak an thlang a, khawvel huapa lar pha lo Arya a rawn inlar. Kum 24 mi Arya hi India U19 international hlui a ni a, Delhi Premier League-ah over khatah six vawi ruk a vuak chhuah avangin fak a hlawh hle.

Delhi Premier League-a a chet ṭhat avangin Syed Mushtaq Ali Trophy-ah Delhi ai a awh a, a chet ṭhat zarah IPL khelhna hun remchang a inhawng. Punjab, Delhi Capitals leh Royal Challengers Bengaluru ten lilamnaah an inchuh a, nuai 380-in Punjab-in an chang.

Pre season-a a chet ṭhat avangin Ricky Ponting leh thuneitu lam mit a tlung a, khelhna hun remchang a neh phah. Chennai an hmachhawn hma chiah hian Punjab-in Rajasthan Royals nen an inkhelh ṭumin ball khat lekah a 'out' nghal a, CSK lakah erawh team chakpuitu a ni.

Punjab hian over 20-ah 219 runs an siam a, CSK hian 201/5 chauhin an chhanglet. Zanin dar 7:30 hian Royal Challengers Bengaluru leh Delhi Capitals te an inkhel leh ang.