Poland ramah Chelsea inkhel dawn

Chelsea hian tun hmain Poland ramah an la inkhel ngai lo a, zanin dar 10:15-ah an dai ngai loh ramah Legia Warsaw an hmachhawn dawn. Blues hian Conference League quarterfinal first leg khel turin Legia Warsaw an lenchilh dawn a ni.

Enzo Maresca enkawl Chelsea hian Conference League hi an khel ṭha hle a, last 16 thleng kha chuan an elpui tawk deuh tur pawh an awm meuh lo, player ṭha ṭhenkhat dahṭha chung pawhin hnehna an chang leh mai ṭhin.

Tunah erawh a thiam pariat chin chauh an ni tawh a, English club tan chetsual ve theih a nih avangin an ngaithutak hle tawh tura ngaih a ni, an player ṭhate an inlan ang - inkhawl pawh a hmuhnawm tura ngaih a ni.

Kar tawpa Premier League an khelh ṭumin - Cole Palmer, Nicolas Jackson, Marc Cucurella, Pedro Neto leh Levi Colwill te chu a tir lamah hawhchawlh tir an ni a, zaninah tha tharin an khel thei ang.

Conference League group match lamah kha chuan Chelsea hian an player ṭha ṭhenkhat an chhawr lo a ni mai lo a, squad-ah pawh an ziak lut lo. Mahse, knock out chinah an ziak lut, tun season atana nomawi an beisei theih awmchhun a nih avangin a pawimawh.

Blues manager Maresca chuan, "Khingpui awlsam leh nem a awm thei tawh lo, eng team mai pawh hian ṭhatna lai tak an nei vek. A bik takin khualmualah chuan fimkhur lehzuala kan chet a ngai dawn a ni," tiin a sawi.