A chung berah Cavaliers an chiang ta

Cleveland Cavaliers chuan Eastern Conference table chung ber an luah tlang dawn tih a chiang ta, an dinhmun ti chiang tur hian nimin zing NBA regular season inkhelah Chicago Bulls chu 135-113 in an hneh.

Tun kar tawpah NBA regular season an khel zo tawh dawn a, chumi hnuah playoff an khel leh ang. Kenny Atkinson-a enkawl Cleveland hian a chung ber an luah avangin post season an hman hunah an dinhmun a ṭha thei dawn a ni.

Atkinson chuan, "Tunah chuan kan hnehna chan leh kan dinhmun hi kan lawm phawt ang, mahse rilru dang pu hman erawh kan ni lo, inelna hautak zawk hmachhawn tura inpeih a ngai," tiin a sawi.

Cavs hian regular season an hman laiah vawi 63 tehmeuh hnehna an chang a, anmahni hnaih bertu Boston Celtics chu vawi 59 an chak tawh thung - an hmabakah Celtics hi chak vek pawh ni se an chunga mi an umphak thei tawh lo.