Champions League quarterfinal; Dortmund tan Barca an 'u' hret

Barcelona-in Champions League quarterfinal first leg-ah Borussia Dortmund 4-0 in an sawp a, Signal Iduna Park-ah second leg khelh tur la ni mah se Catalan club hi semifinal lut chiangah an ngaih theih. Nilaini zan inkhelah hian Robert Lewandowski-a'n a club hlui lamah goal hnih a khung bakah Raphinha leh Lamine Yamal ten goal khat ve ve an khung bawk.

Hansi Flick-a kaihhruai Barcelona hi La Liga hmahruaitu an ni a, Copa del Rey final lut tawhin Real Madrid nen an inhmachhawn dawn. Catalan club hi treble champion thei dinhmunah an ding a, nomawi pathum an chawi thei a nih chuan Bayern Munich treble champion pui tawhtu Flick-a ropuina belhchhahtu a ni ang.

Barca an chungnung

Bayern Munich manager hlui pahnih Flick leh Niko Kovac te an inhmachhawn a, Bavarians hlawtlinpuitu zawk Flick a chungnung. Estadi Olímpic Lluís Companys-a inkhelah rawlthar duhawm Lamine Yamal a nung nghal a, Dortmund lamin goal venhim hna an thawk.

Dortmund keeper Gregor Kobel-a'n hna a ngah a, Barca tlarhma a chelh reng thei lo. Raphinha-a'n minute 25-naah goal a khung a, Brazilian forward hian Pau Cubarsí goal khung tur a tlawh lut a ni mah zawk. Fermin Lopez-a freekick chu Iñigo Martínez-a'n tauh letin Cubarsi hian goal-ah a pet a, goalline a pelh hmain Raphinha-a'n a tlawh lut.

Goal khat hnuah Dortmund insiamṭha hret mah se Jamie Gittens-a'n a hun ṭha neih chu a pet na tawk lo a, Wojciech Szczęsny tan dan harsa a ni lo. First half-ah team ṭha zawk Barca-in 1-0 in hma an hruai.

An khung belh zel

Goal khat lekah Barcelona an lungawi lo a, second half-ah na zawkin an nawr. Minute 48-naah player ṭha danglamna a rawn lang a, Lamine Yamal-a vawrhluh chu Raphinha-a'n tauh letin Lewandowksi-a'n goal ruakah a tauh lut.

Dortmund tlarhnung a phui tawk lo a, Fermin Lopez-a'n goal ngei tura ngaih chu goal pawnah chiah a pet chhuak. Mahse, Barca player-te thiamna a lang zel. Yamal leh Fermin te thawhrah sengin Lewy-a'n minute 66-naah goal hnihna a khung.

Rawlthar duhawm bik Yamal pawh a petuah chauh ṭang loin goal khungtuah a ṭang. Raphinha ball pek chu Yamal-a'n minute 77-naah a khung. Dortmund-in hun tawp dawn hnaihah Maximilian Beier hmangin sut ṭhen mah se offside vangin pawm a ni lo. Minute 90 chhunga chungnung zawk Barcelona 4-0 in an chak.

Barcelona manager Hansi Flick chuan, "Kan la tlang lo. Goal tam taka chak a pawimawh a, chutihrualin football-ah chuan thil mak tak tak a thlen ṭhin avangin second leg kan lak thutak a ṭul hle a ni," tiin a sawi.