Paris khawpuiah Villa an chuai

Paris Saint Germain chuan Nilaini zan khan an mikhual Aston Villa chu 3-1 in an hneh. Luis Enrique enkawl PSG hi Champions League semifinal lut turin an dinhmun a ṭha ta hle a ni.

Inkhel chu

Unai Emery-a'n nidang ang bawkin a naute chu an khingpui goal nawr turin a ti. Parc des Princes-ah an chefuh hmasa zawk, minute 35-naah Morgan Rogers chuan Youri Tielemans-a siamsak khungin hma an hruai.

Mahse, mikhual Villa lam lawm chhung erawh a rei lo - goal an khung aṭanga minute li hnu lekah an chhuah. Desire Doue chuan yard 20 zeta hla aṭan gin a khung, keeper boruak nei lian tak Emiliano Martinez tan dan theih a ni lo.

Paris khawpui a thlen hma aṭanga sawi hlawh Martinez-a'n an lama lut tur a dang zui zauh zauh a, inveng reng thei erawh a ni bik lo. Second half tir lamah Khvicha Kvaratskhelia-a goal kan hmu a, hmahruaitu an inthlak.

Georgian winger Kvaratskhelia hi thlasik bazar laia Napoli aṭanga an lak kha a ni a, Ligue 1 bakah Champions League lamah an hmang ṭangkai hle, danglamna thlentu a ni ṭhin.

Hun tawp dawnah PSG lamin an chak an nemnghet. Nuno Mendes chuan an goal thumna a khung a, goal an neih belh avangin Villa Park an tlawh hunah pawh thlamuang deuh hlekin an khelh theih phah ang.

Goal thumna a luh hnuah stadium chhunga PSG ṭantute thawm a ṭha hle, goal chhuahtu Martinez an au nasa hle a ni. Villa goalkeeper hi club tan ni lo an ram Argentina tana a chet dan avangin Paris khawpuiah hian lawm a hlawh lo.

Argentinan leh France ten Qatar World Cup an khelh ṭumin Martinez hian hun tawp dawnah Kolo Muani goal khung tur a dansak a, a hnuah penalty a dang bawk, an champion hnua a chet dan chu France mipuiten pawm harsa an ti a ni.

Enrique a lawm

PSG manager Enrique chuan, "A tir aṭanga a tawp thleng khan kan khel ṭha zawk, goal kan phur hmasa pawh kha kan inhmeh lo hle, a chhan chu a tir aṭanga khel ṭha zawk an nih vang a ni.

"Team ṭha leh puitling kan nihna chu a takin a lang leh ta a, goal ṭha bik pathum kan khung. Goal kan chhuah hmasakna khan team ṭha leh huaisen zawkah min siam," tiin a naute khelh danah a lungawi hle.

Spanish mnager Enrique kaihhruaina hnuaiah PSG hian hma an sawn, season hmasa khan France rama inelna pathumah an champion - tun season kal laiah pawh tlawm miah loin Ligue 1 nomawi an humhim.

Ligue 1 champion nih an duhtawk mai lo; French Cup la thei dinhmunah an la ding a, tunah chuan Champions League semifinal chu an ke lehlamin an rap tawh tia sawi theih a ni bawk.

Lionel Messi, Neymar leh Kylian Mbappe te an neih lai khan Paris club hian UCL nomawi an chawi thei lo, tunah erawh coach ṭha Enrique an nei a, club neitu lamin an duh ber lak tumin hma an la mek a ni.

Emery a beidawng lo

Goal hnih phur tawh mah se Aston Villa manager Unai Emery a la beidawng lo a, anmahni khelmuala an inkhelh ve hnuah thawh chhuah leh theih a la inbeisei - fans puihna an mamawh tur thu a sawi bawk.

Premier League club Villa hian tun season chhungin Villa Park-ah UCL match khel tura mikhual an thlenin tlawm an la nei miah lo, vawi ruk champion tawh Bayern Munich meuh pawh an hneh thei a ni.

Emery chuan, "Kar lehah keimahni khelmualah kan la inkhel ve leh dawn. Villa Park hi kan tan chuan hmunpui a ni a, tlawptu ṭha tak nen mikhual kan lo dawngsawng dawn a ni a, a danglam tawh ang.

"Villa Park-ah hian chuan kan danglam, goal hnih emaw goal thum emaw chu kan khung leh mai ṭhin," tiin a naute a ringtawk hle a, inkhel hmuhnawm an chhawp chhuak ngei ang tih a rin theih.

Chutihrualin, Villa hian goal khung tam an tum lutuk karah an tlarhnung a phui lo ve thei bawk a, fimkhur taka an nawr a ngai dawn a ni. Attacking game khel team pahnih an nih avangin goal chu kan hmu leh ngei ang.