Liverpool-ah Salah a cham dawn

Trent Alexander-Arnold chhuah tur thu thuthang leng vel karah Liverpol fan-ten chanchin lawmawm hriat tur an nei a, an player chhuanvawr Mohamed Salah chuan Anfield-a khelh chhunzawm zel turin contract thar a ziak dawn.

Salah aiawh leh Liverpool te chuan indawrna hi an kalpui mek a, he thu buatsaih a nih lai hian inremna la awm lo mah se, khawthlang media-te chuan an inrem dawn chiang tawh niin an tarlang - Reds ṭantute tan rimawi a tling ang.

Kum 32 mi Salah hian nipui transfer inhawn rualin Reds-a a contract a hmang zo tawh dawn a, hetiang boruak karah hian hlawh uchuak taka inpek huamin Saudi Pro League lam an lo lang ve reng bawk.

Reds ṭantute an hlauthawng a, Salah lahin media hmaah an indawrna a sawi chhen a, fan-te a tihlauthawng. Nikum September-a 3-0 a Manchester United an hneh ṭum khan Salah hian, "Liverpool-a ka season tawp ber a ni tawh," tiin a sawi.

November thla pawh khan Salah hian thawm nei lehin, "Ka cham aiin ka chhuah a hnai zawk," a ti a, thla khat hnu lawkah, "Inrem kan hlat rih hle," tiin Liverpool nena an chungchang a sawi zui a, tunah chuan a cham dawn ta.

Kum 2017-a Liverpool zawmtu Salah hian rin phak bakin Anfield-ah a hming a chher a, tun season-ah Premier League nomawi chawi thei dinhmunah an ding mek a, Salah pawh Ballon d'Or thlengin a hming a ri ring hle.

Tun season-ah ringawt pawh Salah hian Liverpool tan match 45 khelin goal 32 a khung a, assist vawi 22 a nei. English club tan hian nomawi chawi theih ang chu a chawi kim tawh a, match 394 a khelhsak tawhah goal 243 khungin, assist vawi 111 a nei bawk.

Hetihlai hian Liverpool centre back Virgil van Dijk pawh Anfield-ah cham turin beisei ila, kan tisual lo mai thei. Dutch defender pawh hian Anfield-ah nipui rualin a contract a hmang zo tawh dawn.

Mahse, VVD chuan, "Kan inbiaknaah hma kan sawn zel. Hei hi club leh keima inkar, indawrna kal mek a nih avangin thui tak ka sawi a rem lo," a ti a, VVD hi Anfield-ah a cham ngei dawn niin a lang.

Southampton aṭanga pound maktaduai 75-a Liverpool pantu VVD hian Reds-ah hlawhtlinna chharin, Premier League leh Champions League nomawi a chawipui a, tun season-ah pawh EPL nomawi chu captain ni chungin Reds tan a chawi nawn tura ngaih a ni.

Netherlands captain ni bawk VVD hian Liverpool tana a khelh hnuah match 313 khelhsak tawhin, goal 26 a khung a, assist vawi 13 a nei - khawvela centre back ṭha ber ang hiala ngaitu an tam hle.

Salah leh VVD hi Anfield-ah an cham a nih ngat chuan, Trent Alexander-Arnold-a'n Real Madrid pan pawh ni se, fans tam tak rilru na a zia deuh ang.