City-in ticket man tisang dawn lo

Manchester City chuan an club fan advisory board-te nena indawrna an neih hnuin, season tharah an inkhel en man tisang lo turin thutlukna an siam - hei hian season ticket leh matchday ticket a huam vek a, City ṭantute tan chuan thu hriat nuam tak a ni ang.

March thla khan Manchester City ṭantu intelkhawm pawl, City Matters chuan club-in ticket man chungchangah inbiakna a neihpui loh avanga an lungawi lohna an lantir a, February thla khan Manchester City fans group langsar zual pasarih zet chuan chairman Khaldoon Al-Mubarak hnenah open letter thawnin, an lungawi lohna an lo lantir tawh bawk.

Hetiang a nih avang hian club chuan April 3 khan City Matters hotute nen meeting an nei a, season thar atan ticket man tito lo turin thutlukna an siam ta a ni.

City chuan thuchhuah siamin, "City Matters aiawhtuten ticketing chungchanga an ngaihdan chi hrang hrang min hrilh avangin lawmthu kan sawi a, fans thlirna aṭanga an thil hmuh dan min hrilhte pawhin min tilawm hle a ni," an ti a, inbiakna tluang taka an neih thu an sawi.

Manchester khaw club hian khelmual chhunga result an neih ṭhat loh piahlamah, tun hnaiah an fan-te nen buaina neuh neuh an nei reng a, ticket resale site Viagogo nen an ticket zawrh chhawn chungchanga an inremnate pawh fan-te hian na takin an lo sawisel tawh - ticket resale company an thawhpui pakuana an ni hial!

Hei mai a ni lo, mikhual club fan-te laka hospitality ticket hralh chhawn te, standard ticket man to taka zawrhte chu City fan-te hian an lo sawisel tawh bawk - tunah chuan an inrem thei ta.

February thla khan Liverpool chuan inkhel enna ticket man an tih to loh tur thu an lo puang ve tawh bawk.