Chelsea keeper a ṭha tawk!

CIES Football Observatory Index chuan tun season-a sawisel hlawh tak, Chelsea fans tam takin an duh loh, goalkeeper Robert Sanchez chu khawvela keeper ṭha zingah a telh - Sanchez-a chungah hian keeper panga chiah an awm!

Data hmanga football chhut a, zirchiang ṭhintu CIES hian khawvela keeper ṭhazual thlang chhuak tur hian keeper-in match a khelh zat, an result, league-a an save neih ṭhin hlut zawngte an chhut vek a, Sanchez hi paruknaah a lang phak tlat.

Kum 27 mi Sanchez hian Premier League-ah ringawt vawi nga a tihsual vangin goal a chhuah tawh a, English top flight league season kal mekah a tihsual aṭanga goal chhuah hnem ber keeper a ni mek - heti chung hian CIES erawhin an dah hniam duh tlat lo.

CIES chhutna aṭang ringawt chuan Paris St-Germain keeper Gianluigi Donnarumma chu keeper ṭha ber a ni a, Inter Milan keeper Yann Sommer chuan dawtin, Real Madrid tana si ban nghaktu rinawm Thibaut Courtois chu pathumna a ni.

Chelsea boss Enzo Maresca-a'n Chelsea number 1 tura Sanchez a rin avang hian, keeper langsar dang pahnih Kepa Arrizabalaga leh Djordje Petrovic te pawh loan-a chhuahtir an ni a, CIES top 20 keeper-ah an lang phak ve ve!

Kum 25 mi Petrovic hian Ligue 1 club Strasbourg-ah loan-in hun a hmang mek a, a pumpuiah keeper ṭha 11-na a ni. Bournemouth-in beisei phak baka season an hman nana player pawimawh, Blues aṭanga loan-a an hawh Kepa chu 17-na a ni phak.

Premier League nomawi chawi mai tur Liverpool keeper Alisson erawh a lang sang lo a, kum 32 mi Brazil international hi 33-na a ni!